राष्ट्रपति भण्डारीको बंगालादेश भ्रमण कार्यक्रम सार्वजनिक  

३ चैत, काठमाडौं । परराष्ट्र मन्त्रालयले राष्ट्रपति विद्यादेवी भण्डारीले आगामी साता गर्न लाग्नु भएको बंगलादेशको राजकीय भ्रमणको कार्यतालिका सार्वजनिक गरेको छ । बंगलादेशका राष्ट्रपति मोहम्मद अब्दुल हमिदको मैत्रीपूर्ण निमन्त्रणामा चैत ९ र १० गते दुई दिवसीय भ्रमण तय भएको छ ।

भ्रमणको क्रममा बंगलादेश स्वतन्त्रताको स्वर्ण जयन्ती तथा बंगलादेशका संस्थापक शेख मुजिबवुर रहमानको शतवार्षिकी जन्मजयन्तीको अवसरमा आयोजना हुने विशेष कार्यक्रममा सहभागी हुनुहुने संवोधन गर्ने कार्यक्रम रहेको छ।  त्यसैगरी राष्ट्रपति भण्डारीले आफ्ना समकक्षीसँग बंगला भवनमा भेटवार्ता गर्ने कार्यक्रम छ। यस्तै आफ्ना समकक्षीले आयोजना गर्ने स्टेट ब्याक्वेटमा सहभागी हुने कार्यक्रम रहेको परराष्ट्र मन्त्रालयले जारी गरेको विज्ञप्तिमा उल्लेख छ।

यसैगरी भ्रमणका अवसरमा सावरस्थित राष्ट्रिय शहीद स्मारक र धनमण्डीमा रहेको बंगलबन्धुको स्मृति सङ्ग्रहालयको अवलोकन गर्ने, नेपाली प्रतिनिधिमण्डलमा सहभागी सांस्कृतिक टोलीले ढाकामा प्रस्तुत गर्ने शताब्दी समारोह कार्यक्रमको अवलोकनमा गर्दै सोही दिन राष्ट्रपतिको सम्मानमा नेपाली दूतावासमा आयोजना हुने दिवा भोजमा त्यहाँ रहेका नेपाली समुदायसँग भेटघाट गर्ने कार्यक्रम छ।

राष्ट्रपति भण्डारीका साथ परराष्ट्र मन्त्री प्रदीपकुमार ज्ञवाली, परराष्ट्र सचिवलगायत वरिष्ठ अधिकारी तथा सम्बन्धित मन्त्रालयका मन्त्रीहरु सहभागी हुने कार्यक्रम तय भएको छ।