देउवाको रहष्यमय मौनताप्रति पाैडेलकाे आशंका

३ चैत, काठमाडौं । सर्वाेच्च अदालतले प्रधानमन्त्री केपी ओलीले गरेको प्रतिनिधिसभा विघटन बदर गरेको तीन हप्ता बितिसक्दा पनि राजनीतिक दलहरुले बैकल्पिक सरकार दिन नसक्दा देश थप अन्योल र अस्थिरतातिर धकेलिएको छ । ओलीको गैससंवैधानिक कदम बदर गरेर शासन चलाउने नैतिक बल समेत नरहेको सन्देश दिन अदालतले बाटो खोल्दासमेत राजनीतिक क्षेत्र अलमलमा पर्नु आफैंमा लज्जास्पद अवस्था हो ।

अझ प्रमुख प्रतिपक्षी दल नेपाली कांग्रेसले यसका लागि सकृयता देखाउनुपर्नेमा नजरअन्दाज गरेको पाइन्छ । पार्टी भित्रबाट सर्वसम्मत रुपमा सभापति शेरबहादुर देउवालाई आफ्नो नेतृत्वामा नयाँ गठबन्धन बनाउन वरिष्ठ नेता रामचन्द्र पौडेल र पूर्व महामन्त्री कृष्णप्रसाद सिटौला पक्षले हरियो झण्डा देखाउँदा पनि देउवा भने उदासिन बनेका छन् । प्रतिनिधिसभा पुनस्थापना भएलगत्तै तत्कालिन नेकपा नेताहरु पुष्पकमल दाहाल ‘प्रचण्ड’ र माधवकुमार नेपालले देउवालाई नयाँ सरकार गठन गर्न आह्वान नै गरेका थिए ।

यसैबीच फागुन २३ को सर्वाेच्चको अर्काे फैसलाले व्यूँतिएको नेकपा र माओवादी केन्द्रको गठजोड अब भत्किएको छ । माओवादीले समर्थन फिर्ता लिने वित्तिकै ओली सरकार अल्पमतका पर्नेछ । तर यस्तो अवस्थामा ओलीले ३० दिन भित्र विश्वासको मत लिनुपर्ने हुन्छ । जबकी माओवादी पक्ष ओलीलाई त्यो सुविधासमेत दिने पक्षमा छैन ।

अहिले सत्ताको साँचो हातमा लिएर बसेको जनता समाजवादी पार्टी पनि ओली सरकारको विकल्प दिन तयारै देखिएको छ । उसले यसका लागि कांग्रेस सभापति देउवाले कुनै चासो नै नदेखाएको आरोप लगाएको छ । यद्यपि देउवाकै नेतृत्वमा सरकार बनाउने प्रस्ताव भने उसले अझै प्रष्टसँग राखेको छैन । तर देउवाको मौनताबारे उसले उठाएको प्रश्न भने जायज मान्नुपर्छ ।

कांग्रेसका वरिष्ठ नेता पौडेलले आज पोखरामा आयोजित एउटा कार्यक्रममा यस्तै आशंका व्यक्त गरेका छन् । सबैतिरबाट ओलीविरुद्ध माहोल बन्दा पनि देउवा मौन बस्नु आफैंमा रहष्यमय भएको उनले गुनासो गरे । पार्टीले सर्वसम्मत रुपमा देउवालाई वैकल्पिक सरकार बनाउन आह्वान गर्दा समेत वेवास्ता गर्नु अनौठो छ– उनले भने । ओलीको ज्यादति अन्त्य गर्ने मौका आएको तर देउवाको भूमिका भने शंकास्पद रहेको उनले बताए ।

उनले भने–सभापतिकै कारण अहिले कांग्रेसको हातबाट फेरि मौका गुुम्ने अवस्था आएको छ । ओलीतन्त्रबाट देशले मुक्ति चाहेको भन्दै उनले अब माओवादी केन्द्र र जसपासँग तत्कालै छलफल गरिहाल्न उनले सुझाए । हिजोका लागि त्रिदलीय बैठक बस्ने तय भएपनि देउवाको बेवास्ताले बस्न नसकेको आरोप जसपा नेताहरुले लगाएका छन् । त्यसको खण्डन देउवाले गरेका छैनन् ।