निकुञ्जमा निउरो टिप्‍न गएकी महिलाकाे पाटेबाघको आक्रमणबाट मृत्यु

४ चैत, बर्दिया । बर्दियामा पाटेबाघको आक्रमणबाट फेरि एक महिलाको ज्यान गएपछि घटनास्थल वरपर त्रास बढेको छ । बर्दिया राष्ट्रिय निकुञ्जमा निउरो टिप्‍न गएका तीन महिलामध्ये ठाकुरबाबा नगरपालिका-७ की ५५ वर्षीय डल्ली रावतको बाघ आक्रमणबाट मृत्यु भएको बर्दिया राष्ट्रिय निकुञ्जले जनाएको छ ।

मंगलबार दिउँसो रावतलाई बाँघले झम्टेर लगेपछि उनको खोजी गर्दा निकुञ्जको बघौरा फाँटमा शव भेटिएको हो । महिलाको अगाडिको आधा शरिर बाघले खाएको अवस्थामा भेटिएको निकुञ्जका सहायक संरक्षण अधिकृत असिमकुमार थापाले बताए ।

यसअघि फागुन २६ गते बर्दियाको मधुवन नगरपालिका-३, स्थित सामुदायिक वनभित्र घाँस काट्न गएकी कोठियाघाट बजारकी २७ वर्षीया रिना सुनारको पाटेबाघले आक्रमण गर्दा ज्यान गएको थियो ।

यस्तै फागुन १७ गते सामुदायिक वनमा भैँसी चराउन गएका बर्दिया राजापुर नगरपालिका-१० का ६५ वर्षीय लालबहादुर थारुलाई बाघले आक्रमण गरि ज्यान लिएको थियो । बर्दिया राष्ट्रिय निकुञ्ज र आसपास क्षेत्रमा बाघको आक्रमणबाट यो वर्ष मात्रै ९ जनाको ज्यान गइसकेको छ ।