कर्णाली सरकारमाथिको समर्थन यथावत रहेको नेपाल पक्षको दाबी

४ चैत, बीरेन्द्रनगर । नेकपा एमालेका तर्फबाट कर्णाली प्रदेश सरकारलाई दिइएको समर्थन फिर्ता लिएको भनी आएको समाचारप्रति खनाल – नेपाल समूहले असहमति प्रकट गरेको छ । प्रदेश सरकारमा मन्त्री समेत रहेका प्रकाश ज्वालाले भर्खरै एक विज्ञप्ति जारी गर्दै नेकपाले नभई ओली समूहले एकलौटी रुपमा समर्थन फिर्ता लिएकाले आफूहरुको समर्थन यथावत रहने प्रष्ट्याएका छन् ।

यसअघि एमाले संसदीय दलका नेता यामलाल कंडेलले मुख्यमन्त्री महेन्द्र शाही सरकारलाई दिइएको समर्थन फिर्ता लिएको खबर सार्वजनिक भएको थियो । उक्त निर्णयलाई मन्त्री ज्वालाले गुटगत भेलाको निर्णय भन्दै सरकारमाथिको समर्थन यथावत रहेको प्रष्ट्याएका छन् ।
ओली समूहको गुटगत भेलाबारे हामीलाई सूचनासमेत नदिई गरेको भनिएको निर्णय अवैध रहेकाले हाम्रो पूर्ण असहमति रहेको जानकारी गराउँछौं– विज्ञप्तिमा उल्लेख छ ।

प्रदेश सभामा एमालेको २० सिट रहेको छ । आजको बैठकमा १० जना मात्र उपस्थित थिए । त्यसैले उक्त निर्णय अवैधानिक छ भन्दै मन्त्री ज्वालाले सरकारमाथि कुनै संकट नरहेको पनि बताएका छन् ।