दोस्रो चरणको काेराेना खोप कार्यक्रम स्थगित हुने

४ चैत, काठमाडौं । स्वास्थ्य तथा जनसंख्या मन्त्रालयले दोस्रो चरणको काेराेना खोप कार्यक्रम केही समयका लागि स्थगित हुने जनाएकाे छ । पहिलो डोज लगाएकाहरुलाई दोस्रो डोज वैशाख ७ गतेदेखि ११ गतेसम्म दिने भनिएपनि दोस्रो चरणको खोप कार्यक्रमलाई स्थगित गर्ने निर्णय गरेको हाे। मन्त्रालयले फागुन २३ देखि चैत ३ गतेसम्म ६५ वर्षमाथिका व्यक्तिलाई दोस्रो चरणको खोप कार्यक्रम अन्तरगत कोरोना भाइरस विरुद्धको खोप दिन सुरु गरेको थियो ।

मन्त्रालयले दोस्रो चरण अन्तर्गत ५५ वर्ष ६४ सम्मका व्यक्तिलाई दोस्रो चरणमा खोप दिने कार्यक्रम तय गरे पनि खोप आपूर्ति गर्न केही समय लाग्ने देखिएपछि सो कार्यक्रमलाई स्थगित गर्नु परेको हो । मन्त्रालयका अनुसार भारतको सिरम इन्स्टिच्युट अफ इण्डियाले नेपाललाई थप खोप उपलब्ध गराउने बारे औपचारिक धारणा सार्वजनिक नगरेका कारण केही समयलाई खोप कार्यक्रम स्थगित गर्नु परेको छ ।

सिरमबाट नेपालले अझै १० लाख डोज खोप प्राप्त गर्नै बाँकी छ जुन केही दिनमै नेपाल आउने छ । तर, नेपालले खरिद गर्न प्रस्ताव गरेको थप ५० लाख डोजको विषयमा भने छलफल भइरहेको छ ।

विश्व बजारमा नै खोपको माग अत्याधिक भएका कारण सिरमले नेपाललाई खोप उपलब्ध गराउने सक्ने यकिन मिति र संख्या निर्क्योल गर्न नसकेको हाे । नेपालले हालसम्म ३ लाख बढी डोज खोप प्राप्त गरिसकेकाले कोभ्याक्स अन्तर्गत प्राप्त हुने खोपका लागि पनि केही सयम लाग्ने देखिएको छ ।

नेपालले हालसम्म पहिलो चरण ४ लाख ३८ हजार ८ सय ७९ र दोस्रो चरणमा १२ लाख १५ हजार ४ सय ७७ गरेर करिब १६ लाख ५४ हजार ३ सय ५६ व्यक्तिलाई खोप दिएको छ भने कुल २३ लाख ४८ हजार डोज खोप प्राप्त गरेको छ । नेपालले प्राप्त गरेका सबै खोप सिरमको कोभिशिल्ड नै हो ।

जसमा १० लाख डोज खोप भारतले ‘खोपमैत्री’ अभियान अन्तरगत उपहार स्वरुप दिएको थियो । त्यसपछि नेपालले २० लाख डोज खोप सिरमसँग ४ अमेरिकी डलरमा खरिद गरेको हो । खरिद गरेको खोपमध्ये १० लाख डोज नेपाललाई फागुन ९ गते नै प्राप्त भइसक्यो भने बाँकी १० लाख डोज छिट्टै प्राप्त हुने बताइएको छ । यस्तै अर्को ३ लाख ४८ हजार डोज भने कोभ्याक्स सुविधा अन्तर्गत प्राप्त भएको हो ।