ओली नक्कली एमालेः नेपाल

६ चैत, काठमाडौं । नेकपा एमालेका वरिष्ठ नेता माधवकुमार नेपालले केपी ओलीले पार्टी निर्माणमा कुनै भूमिका नखेलेको भन्दै उनलाई नक्कली एमालेको संज्ञा दिएका छन् । आफू निकट अखिल नेपाल महिला संघको भेला आज उद्घाटन गर्दै यस्तो संज्ञा दिएका हुन् । ओलीले धेरै फूर्ति नगरे हुन्छ, एमाले पार्टी निर्माणमा उनको भन्दा बढी योगदान अरुको छ – नेता नेपालले भने ।

अहिले प्रकारान्तरले उनी अध्यक्ष भएका छन्, तर उनी सक्कली एमाले होइनन् भन्दै नेता नेपालले ओली नक्कली एमाले भएकाले पार्टीमा उनको हैकम नचल्ने प्रष्ट पारे । हामीलाई एमालेमा स्वागत गर्न उनी माओवादीलाई अह्राउँछन्,तर उनी आफैं चाहिं एमाले होइनन् – नेपालको आरोप छ ।

प्रधानमन्त्रीसमेत रहेका एमाले अध्यक्ष ओलीले गत फागुन २८ गते नेकपा माओवादी केन्द्रका २३ जनालाई केन्द्रीय सदस्यमा मनोनयन गरेका थिए । उनीहरुले नेता नेपाल लगायतका नेतालाई एमालेमा स्वागत छ भनेको प्रसंग झिक्दै उनले भने–ओलीले हामीलाई एमाले भित्र आउन यस्ता लाउकेको प्रयोग गर्न थालेका छन् ।

ओली एमाले नभएर बरु आफूलाई माले दाबी गर्न सक्छन् भन्दै नेता नेपालले अब एमाले भित्र उनको दादागिरी लामो नचल्ने बताए । ओलीको घमण्ड र अहंकारले देशले ठूलो क्षति ब्यहोरेको चर्चा गर्दै नेता नेपालले अब पनि नसच्चिने हो भने इतिहासले निर्ममतापूर्वक समीक्षा गर्ने बताए । सिद्धान्तनिष्ठ राजनीति गरौं , धेरै तुजुक नदेखाउ भन्दै उनले ओली प्रवृत्ति विरुद्ध निरन्तर संघर्ष गर्ने पनि उनले बताए ।