विधान संशोधन प्रस्ताव केन्द्रीय समितिमा लैजाने एमाले संसदीय दलको निर्णय  

७ चैत, काठमाडौ ।  नेकपा एमालेको संसदीय दलको बैठकले विधान संशोधन प्रस्ताव केन्द्रीय समितिमा लैजाने निर्णय गरेको छ । शनिबार प्रधानमन्त्री निवास बालुवाटारमा बसेको संसदीय दलको बैठकले संशोधित विधान परित गर्दै उक्त विधानलाई केन्द्रीय समितिमा लैजाने निर्णय गरेको हो ।

आज बसेको संसदीय दलको बैठकले दलको विधान संशोधन प्रस्ताव परित गरेर केन्द्रीय समितिमा पठाउने निर्णय गरेको प्रमुख सचेत विशाल भट्टराईले जानकारी दिए ।

बैठकमा नेपाल – खनाल पक्षको ज्ञापन पत्र

पार्टी संसदीय दलका नेता केपी शर्मा ओलीले बोलाएको संसदीय दलको बैठकमा नेकपा एमालेका वरिष्ठ नेता माधवकुमार नेपाल, झलनाथ खनाल पक्षले संसदीय दलका नेता ओलीलाई ज्ञापनपत्र बुझाएको छ । ज्ञापनपत्र बुझाउन बैठकमा सोमनाथ पाण्डे, जीवनराम श्रेष्ठ र यज्ञराज सुनुवार ज्ञापनपत्र लिएर बालुवाटार पुगेका थिए ।

तीन सांसदले ल्याएको ज्ञापनपत्र बुझेपछि दलका नेता एवं प्रधानमन्त्री केपी शर्मा ओलीले व्यक्तिगत रुपमा कुरा राख्न आग्रह गर्दै कुनै गुटगत र सामूहिक रुपमा आएको प्रस्ताव स्वीकार्न नसक्ने बताएका छन् । माधव नेपाल पक्षले भने बैठक बहिस्कार गरेको छ । संसदीय बैठक सकिएसँगै अब केहीवेरमा पार्टी केन्द्रीय समिति बैठक सुरु हुने बताइएको छ ।