कांग्रेसको मुख्य एजेण्डा व्यवस्था बचाउनु हाे : नेता पौडेल

६ चैत, काठमाडौं । नेपाली कांग्रेसका नेता रामचन्द्र पौडेलले प्रधानमन्त्री केपी ओलीको विकल्प खोज्नुपर्ने बताएका छन् । नेपाल ट्रेड युनियन कांग्रेसले शनिबार काठमाडौंमा गिरिजाप्रसाद कोइरालाको ११ औं स्मृति दिवसमा गरेको कार्यक्रममा नेता पौडेलले कांग्रेसको अहिलेको मुख्य एजेण्डा व्यवस्था बचाउनु रहेको बताए ।

उनले संविधान र संसद् नै फालेर मैमत्ता हुन खोज्‍ने ओलीको विकल्प खोज्‍न कांग्रेस डराउन नहुने बताए । यो कांग्रेस मौन बस्‍ने बेला नभएको उनको भनाइ छ । पौडेलले संसदीय प्रणाली कांग्रेसको आर्दश भएको बताउँदै संसद् र संसदीय प्रणालीलाई बचाएर अगाडि बढ्नु पर्ने बताए ।

उनले संसदीय व्यवस्थामाथि प्रहार भइरहदा यसैलाई मलजल गर्ने कि निस्तेज बनाउन लाग्‍ने हो भनेर प्रश्न पनि गरे । कांग्रेसले अहिले चुनाव नभई संसदलाई कसरी उपयोग गर्ने भनेर काम गर्नुपर्ने र संविधान बचाउन लोकतन्त्र पक्षधरहरुको सरकार दिनुपर्ने वरिष्ठ नेता पौडेलले बताए ।