कट्टेलको नेकपामा प्रचण्ड–माधव अटाउने ?

८ चैत, काठमाडौं । सर्वाेच्च अदालतको एउटा फैसलाले आहात बनाइएका प्रधानमन्त्री केपी ओली अर्काे फैसलाबाट उत्साहित भएका छन् । त्यही उन्मादमा उनी नेकपा एमाले विभाजनको खाका बनाउँदै छन् । सर्वाेच्च अदालतको फागुन २३ को फैसलाबाट शक्तिसञ्चय गर्न सफल भएको भनिएका ओली एकाएक हिटलरी शैलीमा देखापरेका छन् ।

सग्लो नेकपा रहँदा चार चार पटक आफूलाई पार्टीबाट निष्काशन गरिएको रिस अब उनी असन्तुष्ट पक्षसँग फेर्दैछन् । हिजो मात्रै उनले आफू पक्षीय केन्द्रीय कमिटी बैठक राखेर वरिष्ठ नेता माधवकुमार नेपाल, उपाध्यक्ष भीमबहादुर रावल, उपमहासचिव घनश्याम भूषाल र सुरेन्द्र पाण्डेलाई कारबाही गर्न स्पष्टीकरण सोध्ने निर्णय गराएका छन् ।

त्यतिले उनको चित्त बुझेको छैन । उनी आफ्नो आलोचना गर्ने सबैको हुर्मत लिन उद्यत् छन् । त्यसैले पार्टीबाट समानुपातिक सूचीमा परेकाहरुलाई फेर्नसम्म सक्ने असीमित अधिकार प्राप्त गर्न सफल भएका छन् । अब ओलीको ध्यान समानुपातिक निर्वाचनबाट प्रतिनिधिसभामा छानिएकाहरुको चिरफार गर्नेतिर केन्द्रित छ । पहिलो चरणमै ओलीले समानुपातिकबाट आएकी रामकुमारी झाँक्रीको झाँको झानर दाउमा रहेका छन् ।

त्यस्तै , प्रत्यक्षबाट निर्वाचित केही सांसद्लाई निष्काशन गर्ने र केहीलाई तर्साएर आफूतिर तान्ने उनको रणनीति प्रष्ट छ । ओलीको यो शैली र प्रवृत्तिले अब सग्लो एमाले रहने अवस्था नै अन्त्य गरिदिएको छ । ओली चाहन्छन्–माधव नेपाललगायत केही नेता माओवादी केन्द्रको साथमा जाउन् । सूर्य चुनाव चिह्नबाट उनीहरुलाई लड्नबाट रोक्नु नै ओलीका एक मात्र चाहना हो । उक्त चाहना पूरा गर्न उनी जस्तोसुकै कदम चाल्न हच्किनेवाला छैनन् । त्यसैको एउटा श्रृँखला हो, पछिल्लो निर्णय ।

ओलीको यो चाहना र शैलीले कस्तो प्रभाव पार्ला, त्यो बुझ्न त केही समय कुर्नै पर्ला । तर ओली प्रवृत्तिले नेकपा एमाले भने विभाजनको डिलमा  पु¥याइसकेको छ । ओलीले आफू निकटहरुलाई यसको छनक दिइसकेका छ्न् । नेता नेपाल लगायत केहीलाई अब सँगै लिएर कुनै हालतमा पनि नजाने अडान उनको रहेको छ । त्यसैले जस्तोसुकै जोखिम मोलेर भएपनि उनी यो कदम चालिरहेका छन् ।

उनको बुुझाईमा पार्टीमा आफूलाई सबैभन्दा ठूलो समस्या पार्ने व्यक्ति वामदेव गौतम हुन् । वामदेवकै उक्साहटामा पुष्पकमल दाहाल ‘प्रचण्ड’ले १९ पृष्ठको आरोपपत्र तयार गरेको ठान्छन् ओली । तर अस्थिर स्वभावका गौतमबाट आफूमाथि त्यति धेरै चुनौती र समस्या नहुने उनको ठम्याइ छ । ओलीको यस्तो शैलीले माधव नेपाल लगायत केही नेता अब विकल्पमा जानैपर्ने निश्कर्षमा पुगेको स्रोतको भनाई छ ।

ओलीले एमालेमा कुनै हालतमा टिक्न नदिने परिस्थिति निर्माण गरेको ठहर उनीहरुको रहेको छ । त्यसैले अब नयाँ शिराबाट कम्युनिष्ट आन्दोलन सञ्चालन गर्ने रणनीति बनाउन थालेका छन् । स्रोत भन्छ– प्रचण्डले नयाँ परिवेशबाट संगठित गर्ने तयारी थालेका छन् । सर्वाेच्च अदालतले नेपाल कम्युनिष्ट पार्टी नाम दिएका ऋषिराम कट्टेलसँग प्रचण्डको घनिभूत वार्ता भइरहेको छ । ओलीसँगको अन्तर्संघर्षको अवस्था हेरेर नेकपा नै पुन परिचालन गर्ने तयारी प्रचण्डको रहेको छ । यसका लागि कट्टेललाई आफूसँग एकीकरण गर्ने पक्षमा छलफल चलिरहेको छ ।

यसबारे प्रचण्डले नेपाल र झलनाथलाई ब्रिफिङ गरिरहेका छन् । ओलीसँग छुट्टिनै पर्ने अवस्था आए नेकपा भित्र फेरि सबै समेटिने समझदारी बनेको छ । ओलीसँग विधिवत रुपमा छुट्टिने वातावरण तयार गरेर माधव – झलनाथहरु नेकपामा समाहित हुने छन् । उक्त पार्टीमा विगत झैं प्रचण्ड र माधव अध्यक्ष रहने र कट्टेललाई वरिष्ठ उपाध्यक्ष बनाइने गरी छलफल अगाडि बढेको स्रोतको भनाई छ ।

त्यसपछि भने नेपाली काँग्रेससँग मिलेर ओलीलाई बालकोट पठाइने गरी तयारी भइरहेको स्रोतले बतायो । तर यतिका काम गर्न नेता नेपाल कत्तिको सक्षम होलान् ,त्यो भने उनको भूमिका र तयारीमा भर पर्छ । स्रोत भन्छ – चैत मसान्तसम्म यो काम भइसक्छ । साथै, नयाँ बर्ष सुरु भएसँगै ओली सरकारको पनि अवसान हुनेछ ।