ओली विदेशी दलालः प्रचण्ड

८ चैत, काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले प्रधानमन्त्री केपी ओली लोकतन्त्र र संघीयताविरोधी भएको आरोप लगाउँदै उनलाई बीसौं वर्षदेखि विदेशी शक्तिले पालेको बताएका छन् ।

आज पार्टी मुख्यालय पेरिसडाँडामा आयोजित एक कार्यक्रमलाई संवोधन गर्दै अध्यक्ष प्रचण्डले भने –ओलीलाई बीसौं वर्षदेखि विदेशीले हुुर्काएका हुन्,त्यसैले उनले विदेशीकै इशारामा काम गरिरहेका छन् ।

अहिले संघीय लोकतान्त्रिक गणतन्त्रलाई ध्वस्त पार्न ओलीले विदेशीको चाहना पूरा गरिरहेका छन् भन्दै प्रचण्डले संविधान मास्ने पात्रका रुपमा उनी पोषित भइरहेको बताए । नेपाली जनताले पाएको राजनीतिक उपलव्धि नरुचाउनेहरुले अहिले ओलीमार्फत आफ्नो अभिष्ट पूरा गर्न लागिपरेको उनको आरोप छ ।

नेपालमा गणतन्त्र विरोधी धारको सेवा गर्ने पात्रका रुपमा ओलीको प्रयोग भइरहेको भन्दै उनले अब नेपाली जनता एकपटक फेरि ओली प्रवृत्ति विरुद्ध लड्ने अवस्था आएको दावी गरे ।