सरकारका कामकारबाहीमाथि अनुगमन गर्न सभामुख र सभापतिहरुबीच छलफल

८ चैत, काठमाडौं । संसदीय समितिका काम कारबाहीबारे सभामुख अग्निप्रसाद सापकोटाले सभापतिहरुसँग छलफल गरेका छन्। सरकारले प्रतिनिधिसभालाई बिजनेश दिन आनाकानी गरिरहेको अवस्थामा सभामुखले सभापतिहरुसँग कुराकानी गरेका हुन्। सरकारले नचाहँदा पहिलो बैठकमै पेश हुनुपर्ने अध्यादेशसमेत रोकिँदै आएको छ।

आइतबार संसदीय समितिका काम कारबाही र विधेयकहरु अघि बढाउने विषयमा सभामुखको कार्यकक्षमा प्रतिनिधिसभाका सभापतिहरुसँग सापकोटाले कुराकानी गरेका हुन्।

विकास समितिकी सभापति कल्याणी खड्का अनुसार चार घण्टाभन्दा बढी चलेको छलफलमा समितिका बैठक निरन्तर राख्ने, सरकारका कामकारबाहीमाथि अनुगमन गर्ने र थाती रहेका विधेयक अघि बढाउने विषयमा कुराकानी भएको जानकारी दिइन्।

पुस ५ गते प्रतिनिसभा विघटन भएपछि ३८ वटा विधेयकको औचित्य सकिएको थियो। तर संसद पुनःस्थापना भएपछि ती सबै विधेयक ब्यूँतिएका छन्।

विधेयकका बारेमा छलफल भए पनि महत्वपूर्ण मानिएको संघीय निजामति ऐन संशोधन विधेयक, नागरिकता संशोधन विधेयक जस्ता अघि बढाउने विषयमा कुनै कुराकानी नभएको प्रतिनिधिसभा सचिव गोपालनाथ योगीले जानकारी दिए। दुवै विधेयक राज्य व्यवस्था समितिमा रहेका छन्।