सशस्त्र प्रहरी निरीक्षकविरुद्ध विशेष अदालतमा भ्रष्टाचार मुद्दा

८ चैत, काठमाडौं । अख्तियार दुरुपयोग अनुसन्धान आयोगले सशस्त्र प्रहरी बल वेश क्याम्प, रुपन्देहीका कार्यालय प्रमुखसहित दुई जनाविरुद्ध विशेष अदालत काठमाडौंमा मुद्दा दायर गरेको छ।

आयोगले सेवाग्राहीको फर्निचर उद्योग संचालनमा सहजीकरण गरिदिने भन्दै सशस्त्र प्रहरी निरीक्षक दधिराम पौडेल र नायब निरीक्षक राजेश पासीले ५० हजार रकम घुस लिने क्रममा रंगेहात पक्राउ परेका थिए।

अनुसन्धानपछि उनीमाथि भ्रष्टाचार मुद्दा दायर गरिएको आयोगका प्रवक्ता नारायणप्रसाद रिसालले जानकारी दिए। यस्तै आयोगले मोरङ, औषधी व्यवस्था विभाग, शाखा कार्यालय, विराटनगरमा कार्यरत फार्मेसी अधिकृत सरोज सुवेदीविरुद्ध पनि भ्रष्टाचार मुद्दा दायर गरेको छ।

सेवाग्राही विरुद्धको मुद्दाको सिलसिलामा जिल्ला सरकारी वकिल कार्यालय तेह्रथुमबाट माग भएको राय पठाई सिल भएको फार्मेसी पसल खोलिदिने भन्दै सेवाग्राहीसँग दुई लाख घुस लिएका थिए। रंगेहात पक्राउ परेका सुवेदीविरुद्ध मुद्दा दायर गरिएको हो।