सत्ता समीकरण निर्माण र पार्टी अधिवेशनका विषयमा छलफल गर्दै कांग्रेस

९ चैत, काठमाडौं । नयाँ सरकार निर्माणका लागि सत्ता समीकरण र पार्टी महाअधिवेशन लगायतका विषयमा छलफल गर्न कांग्रेस पदाधिकारी बैठक बस्दै छ । प्रधानमन्त्री केपी शर्मा ओलीविरुद्ध अविश्वास प्रस्ताव ल्याउने चर्चा चलिरहेका बेला बस्न लागेको पदाधिकारी बैठकलाई महत्वको साथ हेरिएको छ । बैठक आज दुई बजेका लागि बोलाएको हो ।

“बैठकमा पार्टीको आन्तरिक विषयअन्तर्गत महाधिवेशन, क्रियाशील सदस्यताको विषयमा छलफल हुन्छ, यसका साथै राष्ट्रिय राजनीतिको बारेमा छलफल हुने नै छ, । कांग्रेस प्रवक्ता विश्व प्रकाश शर्माले नेपालवहससँग भने ।

संसदको अंकगणित हेर्दा जनता समाजबादी दलले आफ्नो पोजिसन स्पष्ट नगरेसम्म कांग्रेस नयाँ सरकार निर्माणको समिकरणका लागि अग्रसरता नलिने नेता शर्माले बताए ।

सत्तासमीकरण को सँग गर्ने भन्ने विषयमा जनता समाजबादी दल भित्र फरक फरक मत रहदा नेकपा माओवादी केन्द्रले नयाँ सरकार निर्माणका लागि कांग्रेसलाई अग्रसरता लिन आग्रह गरेपनि त्यो सार्थक हुन सकेको छैन । यसबीचमा नयाँ सरकार गठनका लागि  गठवन्धन निर्माणका सम्वन्धमा जसपासँग अनौपचारीक बैठकहरु भने भइरहेको कांग्रेस नेताहरुले जानकारी दिएका छन् ।