बुद्धदर्शन चिनाउने उद्देश्य सहित बुद्ध थिएटर फेस्टिभल

९ चैत,काठमाडौं । आइतबारदेखि डबली थिएटरको आयोजनामा बुद्ध थिएटर फेस्टिभल शुरु भएको छ । भगवान गौतम बुद्धको दर्शन तथा बोधिसत्वको प्रभावलाई रंगमञ्च मार्फत विश्वमाझ चिनाउने उद्देश्य सहित उक्त फेस्टिभल शुरु गरिएको छ ।

आइतबारबाट शुरु भएको फेस्टिभल शनिबारसम्म चल्नेछ । गतवर्ष नै फेस्टिभल आयोजना गर्ने तयारी गरिए पनि कोरोना महामारीका कारण फेस्टिभल हुन सकेको थिएन् । फेस्टिभलका निर्देशक पुस्कर गुरुङका अनुसार यसवर्ष बुद्ध सम्बन्धी बनेका पाँच वटा नाटक फेस्टिभलमा देखाइदै छ ।

डबली थिएटरले बाग्मती प्रदेश सरकार र सांस्कृतिक संस्थान राष्ट्रिय नाचघरसँग मिलेर फेस्टिभल गरेको हो । फेस्टिभलमा शनिबारसम्म हरेक दिन ५ बजे बुद्ध कथामा बनेको नाटक देखाइन्छ । फेस्टिभलको पहिलो दिन भारतीय नाटक निर्देशक डा दानी करमाकर निर्देशित ‘तथागत’ देखाएको थियो । महामारीका कारण कलाकारको टोली आउन नसकेपछि खिचेर पठाएको नाटक देखाइएको थियो ।

सोमबार फेस्टिभलमा विकास जोशीको निर्देशनमा रहेको ‘सिद्धार्थको गृहत्याग’ मञ्चन हुनेछ । त्यस्तै मंगलबार भने झोराहाट नाट्य समूहको प्रस्तुति रहेको रवीन्द्रनाथ टैगोर लिखित नाटक ‘मालिनी’ मञ्चन हुनेछ । फेस्टिभलको अन्य दिन पनि नाटक र बिभिन्न कार्यक्रम रहने बताइएको छ ।