किसान लघुवित्तकाे शेयर कारोबार रोक्का, नेप्सेले माग्यो स्पष्टिकरण

१० चैत, काठमाडौं । नेप्सेले मंगरबार किसान लघुवित्त वित्तीय संस्थाको शेयर कारोबार रोक्का गरेको छ । साथै नेप्सेले लघुवित्तलाई स्पष्टिकरण मागेको छ ।

कम्पनीले नेप्सेमा धितोपत्रको मूल्यमा प्रभाव पार्ने सूचना नियम विपरित पठाएकाले शेयर कारोबार रोक्का राखेको नेप्से प्रवक्ता मुराहरी पराजुलीले जनाए ।

कम्पनीको चैत ६ गते बसेको सञ्चालक समितिको बैठकले शतप्रतिशत हकप्रद शेयर निष्कासन गर्ने प्रस्ताव गरेको र पुनः संशोधन गर्दै उक्त हकप्रद शेयर जारी गर्ने प्रस्ताव हटाएको थियो ।

नेप्सेमा धितोपत्रको मूल्यमा प्रभाव पार्ने सूचना तथा जानकारी सृजना भएमा सोही दिन वा भोलिपल्ट कारोबार खुल्नुअघि नेप्सेमा पेश गर्नुपर्नेछ भन्ने व्यवस्था रहेको छ ।

नेप्सेले धितोपत्रको उक्त कम्पनीलाई दोस्रो बजारमा कारोबार रोक्का गरेको तीन कार्यदिन भित्र के कति कारणबाट हकप्रद शेयर जारी गर्ने भन्ने प्रस्ताव राखि, पुनः हटाई संशोधन गरेको हो ? साथै हकप्रद जारी गर्ने भन्ने सञ्चालक समितिको प्रस्ताव किन समयमै जानकारी दिन नसकेको हो भन्ने बारेमा पनि स्पष्टिकरण पेश गर्न भनेको छ ।