अनेरास्ववियूले समानान्तर गतिविधिलाई निरन्तरता दिने

१० चैत, काठमाडाैं । नेकपा एमाले नेपाल-खनाल समूह निकट अखिल नेपाल राष्ट्रिय स्वतन्त्र विद्यार्थी युनियन ‘अनेरास्ववियू’काे राष्ट्रिय कार्यकर्ता भेलाले समानान्तर गतिविधिलाई निरन्तरता दिने भएकाे छ ।

केही दिनअघि नेपाल-खनाल पक्षले आयोजना गरेको राष्ट्रिय भेलाको निर्णय अनुरूप नै आज सो पक्षले अनेरास्ववियूको राष्ट्रिय कार्यकर्ता भेला बोलाएको हो। यसअघि नेपाल समूहले अखिल नेपाल महिला संघ र युवा संघको राष्ट्रिय कार्यकर्ता भेला गरेर समानान्तर कमिटी बनाइसकेको छ । विद्यार्थीको भेलाबाट पनि समानान्तर कमिटी बनाउने नेपाल समूहको तयारी छ ।

विद्यार्थीको भेलामा एमाले वरिष्ठ नेता माधवकुमार नेपाल, उपाध्यक्ष भीम रावल, सचिव गोकर्ण विष्ट, स्थायी कमिटी सदस्य सुरेन्द्र पाण्डेलगायतका नेताहरु सहभागी छन् । गत सोमबार बसेको नेपाल-खनाल पक्षको बैठकले पनि देशभर पार्टी कमिटी तथा जनसंगठनहरूको भेला, बैठकलाई निरन्तरता दिने र आधारभूत तहसम्मै रहेको आफ्नो शक्ति परिचालन गर्ने निर्णय गरेको थियो।