एमाले मुख्यालय थापाथली हाइटमा !

११ चैत, काठमाडौं ।   सत्ताधारी नेकपा एमालेले आगामी नयाँ वर्षदेखि पार्टी कार्यालय थापाथलीमा सार्ने भएको छ । यस प्रयोजनका लागि एउटा निजी घर भाडामा लिइएको छ । थापाथली हाइटमा अवस्थित अत्याधुनिक साढे दुई तले उक्त भवनमा १३ वटा कोठा रहेका छन् ।

सञ्जय अग्रवाल नाम भएका एक व्यापारीको उक्त घर पाँच वर्षका लागि भाडामा लिन सम्झौता भएको हो । पार्टी अध्यक्षसमेत रहेका प्रधानमन्त्री केपी ओली उक्त भवन अवलोकनका लागि थापाथली पुगेका छन् । ओलीका आर्थिक सल्लाहकार मोती दुगडले उक्त घर मिलाएका हुन् । घरधनी अग्रवाल दुगडका आफन्त हुन् ।

यसअघि धुम्बाराहीमा रहेको पासाङ ल्हाम्हु प्रतिष्ठानले उक्त भवन खाली गर्न एमाले पार्टी समक्ष आग्रह गरेको थियो । यसअघि बल्खुमा अवस्थित नेकपा एमालेको भवन ०७२ साल वैशाख १२ गतेको विनाशकारी भूकम्पका बेला क्षतिग्रस्त भएको थियो । नयाँ भवनको भाडा भने अहिलेसम्म खुलाइएको छैन ।