खाजा खाने क्रममा साथीलाई धारिलो हतियार प्रहार, २ जना नियन्त्रणमा

११ चैत, काठमाडौं । नेपाल प्रहरीले आफ्नै साथीलाई धारिलो हतियार प्रहार गरी घाइते बनाएको आरोपमा २ जनालाई नियन्त्रणमा लिएको छ ।झापा दमक नगरपालिका–४ घर भई काठमाडौंको चन्द्रागिरी नगरपालिका–१५ विष्णुदेवी बस्ने ३० वर्षीय पदम खड्कालाई धारिलो हतियार प्रहार गरी घाइते बनाएको आरोपमा चन्द्रागिरी नगरपालिका–१५ विष्णुदेवी टुसाल चोकका ३७ वर्षीय प्रभुकृष्ण थापा र २३ वर्षीय दिवाकर महर्जनलाई मंगलबार साँझ प्रहरीले पक्राउ गरेको हो ।

होटलमा खाजा खाने क्रममा साथी–साथीबीच झगडा हुँदा प्रभुकृष्ण र दिवाकरले पदमलाई धारिलो हतियार प्रहार गरी घाइते बनाएको प्रहरीको भनाइ छ । त्यसपछि महानगरीय प्रहरी प्रभाग बलम्बुबाट खटिएको टोलीले प्रभुकृष्ण र दिवाकरलाई पक्राउ गरेको हो ।

गम्भीर घाइते भएका पदमलाई उपचारका लागि ओम समाज अस्पताल लगिएकोमा थप उपचारको लागि अन्नपूर्ण न्यूरो अस्पताल थापाथली रिफर गरिएको छ । घटनाका सम्बन्धमा थप अनुसन्धान भइरहेको प्रहरीले जनाएको छ ।