किशोरीलाई गाउँबाट पढाईदिन्छु भन्दै ल्याएर बन्धक बनाई करणी !

११ चैत, बुटवल । नेपाल प्रहरीले किशोरीलाई गाउँबाट पढाउने भन्दै ल्याएर बन्धक र बलात्कार गर्ने दुई जनालाई पक्राउ गरेको छ । प्रहरीका अनुसार बन्धक बनाउने कार्यमा संलग्न रुकुम पूर्वका २३ र १४ वर्षका युवक पक्राउ परेका हुन् ।

पकाउ पर्ने २३ वर्षीय युवक एम्बुलेन्स चालक हुन् । उनीहरुले जिल्लाको विकट क्षेत्र मानिने भूमि गाउँबाट १४ र १५ वर्षका दुई किशोरीलाई रूकुमकोट बजारमा ल्याएर बन्धक बनाई करणी गरेको आरोपमा प्रहरीले नियन्त्रणमा लिएको हो ।

घटना  चैत १ गतेकाे हाे । जिल्लाको भूमिगाउँबाट किशोरीहरुलाई एम्बुलेन्स चालक र अर्का युवकले पढाईदिने भन्दै रूकुमकोट बजारमा  उनीहरूलाई ल्याए। घरबाट हराएका ती किशोरीहरु ९ दिनसम्म पनि परिवारको सम्पर्कमा नआएपछि सोमबारमात्र प्रहरीमा आफन्तको निवेदन परेको थियो । लगत्तै खोजतलास गर्दा रूकुमकोटबाट अभियुक्त पक्राउ परेका थिए ।

किशोरीलाई २३ वर्षीय युवकको कोठामा बन्धक बनाएर जबरजस्ती करणी गरेको अवस्थामा फेला पारी उद्दार गरिएको जिल्ला प्रहरी कार्यालयले जनाएको छ । पढाउने व्यवस्थाको साटो बन्धक बनाएर करणी गर्न थालिएको पीडित किशोरीले प्रहरी सामु बयान दिएका छन् ।

अभियुक्तहरूले किशोरीलाई कोठामा थुनेर राख्ने र विहान बेलुका दिशा पिशाव गर्नको लागि मात्र बाहिर निकाल्ने गरेको पीडितले प्रहरीलाई बताएका छन् । बालिकाहरू रुने, चिच्याउने गरेमा विभिन्न धम्की दिने गरेको पनि प्रहरीले जनाएको छ। अभियुक्तमाथि अपहरण, शरीर बन्धक र जबरजस्ती करणीको मुद्धा दर्ता गरिएको छ ।