पूर्णरूपमा नियन्त्रण नहुञ्‍जेलसम्म सामाजिक दुरी कायम राख्नुपर्ने : ओली

११ चैत, काठमाडौं । प्रधानमन्त्री केपी ओलीले कोभिड-१९ को संक्रमण नकारात्मकता तिर गएको भन्दै भयावह हुन नदिन ध्यान दिनुपर्ने बताएका छन् । बुधबार कोभिड-१९ संकट व्यवस्थापन केन्द्रबाट प्रकाशित नेपालमा कोभिड-१९ महामारी र प्रतिकार्य प्रतिवेदन सार्वजनिकीकरण कार्यक्रममा बोल्दै प्रधानमन्त्री ओलीले कोभिड-१९ को संक्रमण नकारात्मकतातिर जाने लक्षण देखिएको भन्दै भयावह हुन नदिन ध्यान दिनुपर्ने बताएका हुन् ।

यद्यपी अहिले भयावहको स्थिति नभएको उनको भनाइ छ । प्रधानमन्त्री ओलीले खोप लगाएर कोभिड-१९ को संक्रमण निर्मुल पार्न सजिलो नभएको पनि बताए । पूर्णरूपमा नियन्त्रण नहुञ्‍जेलसम्म सामाजिक दुरी कायम राख्नुपर्ने बताए ।

एकपटक कडाइका साथ नियन्त्रण गरेर निर्मुल गर्नुपर्ने प्रधानमन्त्रीको भनाइ छ । पूर्णरूपमा नियन्त्रण नगरेसम्म खतरा भइरहने र पूर्णरूपमा नियन्त्रण गर्न सामाजिक दूरी, संक्रमण हुने स्थितिबाट बच्‍ने, बचाउने काम गर्नु पर्ने प्रधानमन्त्री ओलीले बताए ।

प्रधानमन्त्री ओलीले अन्य देशको तुलनामा नेपालमा कोभिड-१९ संक्रमणको असर कम परेको भन्दै फेरीपनि असर कम पर्ने बताए । संक्रमण बढ्न नदिन स्वास्थ्य तथा जनसंख्या मन्त्रालयको निर्देशन मान्‍नुपर्ने बताए ।