रेशमलाई भेट्न डिल्लीबजार कारागारमा पुगे महतो

११ चैत, काठमाडौं । जनता समाजवादी पार्टी ‘जसपा’का नेता राजेन्द्र महतोले सांसद रेशम चौधरीलाई डिल्लीबजार कारागारमा पुगेर भेट गरेका छन् । नेकपा एमालेसँग सत्ता सहकार्यको हल्ला चलिरहेका बेला टीकापुर हत्याकाण्डका प्रमुख योजनाकारका आरोपमा जन्मकैदको सजाय पाएका निलम्बित सांसद चौधरीलाई भेट्न महतो बुधबार डिल्लीबजार कारागार पुगेका हुन् ।

भेटमा चौधरीलाई नेता महतोले एमालेसँग सत्ता साझेदारीमा जान नहुनेबारे बोलेको हो भनेर सोधेका थिए । चौधरीले आफूले सत्ता सहकार्य लगायतका राजनीतिक विषयमा कोहीसँग केही कुरा नगरेको भन्दै बाहिर आएको कुरा भ्रामक र कपोलकल्पित भएको जवाफ महतोलाई दिएका थिए ।

जसपाभित्र ओली नेतृत्वको सरकारमा जानुपर्छ र जान हुँदैन भन्ने दुई धार देखिँदै आएको छ । यहीबेला चौधरीले जेलभित्रैबाट ओलीसँग सहकार्य गर्नु हुँदैन भनेको प्रतिक्रिया बाहिर आएको थियो । आफूले बोलेको भन्दै बाहिर आएको समाचारमा सत्यता नभएको र त्यसले आफ्नो चित्त दुखाएको भन्दै पार्टीको निर्णय आफूले मान्ने र पार्टी एक ढिक्का भएर अगाडि बढेको हेर्न चाहेको उनले बताएका थिए ।

सर्वोच्च अदालतले ११ फागुनमा संसद पुनर्स्थापना गरेपछि सत्तासमीकरणको विषयलाई लिएर संसद्को चौथो ठूलो दल जनता समाजवादी पार्टी (जसपा)भित्र सुरु भएको विवाद चर्किँदै गएको छ । पूर्वराजपा र संघीय समाजवादी मिलेर बनेको जसपामा मुख्यगरी केपी ओलीसँग सहकार्य गर्ने विषयमा प्रस्ट दुई धार छुट्टिएका छन् । यसले जसपाको विभाजनसम्मको आशंकालाई मद्दत पुर्‍याएको छ ।