सर्वसाधारणलाई सर्तकता अपनाउन जिप्रका स्याङ्जाको अपिल

११ चैत, काठमाडौं । कोरोना भाइरसको संक्रमण विस्तारै बढ्न थालेपछि जिल्ला प्रशासन कार्यालय स्याङजाले सर्वसाधारणलाई सर्तकता अपनाउन आग्रह गरेको छ । प्रशासनले छिमेकी मुलुक भारतमा कोरोनाको दोस्रो लहर सुरु भएको र यसले नेपालमा पनि जोखिम निम्त्याएको भन्दै सूचना जारी गर्दै स्वास्थ्य सर्तकता अपनाउनुको साथै सभा समारोह नगर्न अपिल गरेको हो ।

जिल्ला प्रशासनले भिडभाड हुने खालका कार्यक्रम, सभा तथा समारोह आयोजना र सञ्चालन नगर्न अनुरोध गरेको छ । पटक-पटक साबुन पानीले हात धुन, सेनिटाइजरको प्रयोग गर्न, सार्वजनिक ठाउँमा हिँडडुल गर्दा अनिवार्य मास्क लगाउन र न्यूनतम २ मिटरको सामाजिक दुरी राख्न आग्रह गरेको छ ।

कोभिड १९ को लक्षण देखिएमा तत्कालै तोकिएको स्वास्थ्य संस्थामा गई कोरोना परीक्षण गर्न, होटल, पसल, र व्यापार व्यवसाय सञ्चालन गर्दा जनस्वास्थ्य तथा सुरक्षाका मापदण्ड उचित पालन गर्न आग्रह गरिएको छ । प्रशासनले मास्क प्रयोग नगर्ने लगायत जनस्वास्थ्य तथा सुरक्षाका मापदण्डहरूको पालना नगरेको पाइएमा संक्रमण रोग ऐन, २०२० बमोजिम कारवाही गर्ने चेतावनी दिएको छ ।

गत बर्ष स्याङजामा जिल्ला प्रहरी कार्यलयमा कार्यरत ठुलो संख्यामा प्रहरी कर्मचारी र थुनुवाहरुमा समेत कोरोना संक्रमण देखिएको थियो । बन्दाबन्दीमा जुवा,तास खेलेको अभियोगमा पक्राउ गरेका जुवाडेबाट सदमुकाम नजिकको गाउँभरी नै संक्रमण देखिएकाले प्रशासनले समयमै सूचना जारी गर्दै सजकता अपनाएको हो । जिल्ला भित्र कोभिड १९ को संक्रमणको सम्भावनालाई मध्यनजर गरी सबै स्थानीय तहले क्वारेन्टाइन र आईसोलेसन केन्द्रहरुलाई तयारी अवस्थमा राख्ने भएको छ ।