लालबन्दीबाट १५ किलो गाँजासहित ३ जनालाई पक्राउ

१२ चैत, जनकपुरधाम । सर्लाही प्रहरीले लालबन्दीबाट १५ किलो लागुऔषध गाँजासहित ३ जनालाई पक्राउ गरेको छ । प्रहरीले जिल्लाको लालबन्दी नगरपालिका-७ मा ना२ह ५९३६ नम्बरको अटो चेकजाँच गर्ने क्रममा सिटमुनि लुकाई राखिएको १५ किलो गाँजा बरामद गरेको हो ।

गाँजा फेला परेपछि अटो चालक लालबन्दी ११ बस्ने ४७ वर्षीय सोमबहादुर स्याङतानलाई प्रहरीले नियन्त्रणमा लिएको थियो । उनको सूचनाका आधारमा ईश्वरपुर नगरपालिका ८ वस्ने ३२ वर्षीय रामविश्वास राउत र महोतरीको सोनमा गाउँपालिका-४ वस्ने ३३ वर्षीय रमाशंकर राउतलाई पनि प्रहरीले नियन्त्रण्मा लिएको छ ।

राउतद्वयलाई लालबन्दी नगरपालिका-कालिन्जोर खोलाबाट बीआर ३० टी ०१०३ नम्बरको मोटरसाइकलमा सवार रहेको अवस्थामा नियन्त्रणमा लिई थप अनुसन्धान सुरु गरिएको प्रहरीले जनाएको छ ।

यसअघि ८ चैतको राति लालबन्दी नगरपालिका १७ स्थित रानीगन्जबाट ज १ ह ४६०९ नम्बरको अटोमा सवार तीनजनालाई १५ किलो गाँजासहित पक्राउ गरिएको थियो । अटो चालक ४५ वर्षीय पुष्पबहादुर फुयाँल, ४० वर्षीय सुरेन्द्रकुमार बल र वडा नम्बर १४ निवासी ४१ बर्षीय पाल्साङ पाख्रीङलाई पक्राउ गरी अनुसन्धान थालिएको प्रहरीले जनाएको छ।