तामाको तार चोरी गरेको अभियोगमा पक्राउ

१२ चैत, बाजुरा । नेपाल प्रहरी तामाको तार चोरी गरेको अभियोगमा २ जनालाई पक्राउ गरेको छ । गौमुल गाउँपालिका-१ पोखरास्थित नेपाल टेलिकमको टावरबाट करिब ५२ किलोग्राम तौल भएको तामाको तार चोरी भएको घटनामा संलग्न रहेको आभियोगमा आछाम, सांफे नगरपालिका-१३ बस्ने ३० वर्षीय सुरेन्द्र बाब्ली र बाजुरा बुढिगंगा नगरपालिका-६ फालसैनस्थित ग्रिल उद्योगमा काम गर्ने भारत पिलिभित मैनाली घर भएका १९ वर्षीय तटसिर रजरनलाई बुधबार दिउँसो प्रहरीले पक्राउ गरेको हो ।

त्रिवेणी नगरपालिका-३ स्थित नेपाल टेलिकमको टावरमा रहेको तामाको तार काटीरहेको भन्ने खबर प्राप्त हुनासाथ प्रहरी चौकी मौरेबाट खटिएको प्रहरीले सुरेन्द्र बाब्लीलाई पक्राउ गरेको हो ।

थप अनुसन्धान गर्ने क्रममा उनले बाजुरा गौमुल गाउँपालिका-१ पोखरास्थित नेपाल टेलिकमको टावरमा रहेको तामाको तार चोरी गरी तटसिर रजरनलाई बिक्री गरेको भनी खुल्न आएपछि तटसिर समेतलाई प्रहरीले पक्राउ गरेको हो । साथै तटसिरको डेराबाट चोरी भएको तामाको तार समेत प्रहरीले बरामद गरेको छ । यस सम्बन्धमा प्रहरीले आवश्यक अनुसन्धान गरिरहेको छ ।