विभिन्न जिल्लामा सवारी दुर्घटना, ट्रक चालक प्रहरी नियन्त्रणमा

१२ चैत, काठमाडौं । ट्राफिक प्रहरी विभिन्न जिल्लामा सवारी दुर्घटना परी ५ जनाको मृत्यु भएको जनाएको छ । चितवन, भरतपुर महानगपालिका-९ दासढुङगास्थित सडकमा ना.६ ख ७३७१ नम्बरको ट्रक र बा.२१ च ६८५९ नम्बरको कार एकआपसमा ठक्कर खाई बुधबार दिउँसो दुर्घटना हुँदा कारमा सवार तनँहु स्याम्घा नगरपालिका-४ बस्ने २८ वर्षीय धर्म राज गौली र कास्की लेखनाथ बस्ने ३१ वर्षीय रामकृष्ण भुजेलको मृत्यु भएको हो ।

दुर्घटनामा गम्भीर घाइते भएका उनीहरूको उपचारको लागि पुरानो मेडिकल कलेज भरतपुरतर्फ लैजाने क्रममा बाटोमै मृत्यु भएको हो । साथै दुर्घटनामा घाइते भएका कारमा सवार अन्य ३ जनाको सोही अस्पतालमा उपचार भइरहेको छ । ट्रक चालकलाई प्रहरीले नियन्त्रणमा लिएको छ ।

सिन्धुली, दुधौली नगरपालिका-१४ बाँसकबोटे चिउरी खोला भिरस्थित सडकमा प्रदेश २-०३-००१ त १८७५ नम्बरको ट्याक्टर आफै अनियन्त्रित भई बुधबार दिउँसो दुर्घटना हुँदा ट्याक्टर चालक दुधौली नगरपालिका-१३ ठाकुर दमार बस्ने २५ वर्षीय ईन्द्र बहादुर खड्काको घटनास्थलमै मृत्यु भएको छ । दुर्घटनामा परी घाइते भएका ट्याक्टरमा सवार अन्य २ जनालाई नोबेल अस्पताल बिराटनगर पठाइएकोमा १ जना उपचार पश्चात डिश्चार्ज भएका छन् ।

धनुषा, मिथिलानगर नगरपालिका-२ बिश्वर्माचोकस्थित सडकमा बा.१४ च ८८७४ नम्बरको स्कारपिओको ठक्करबाट साईकलयात्री सोही ठाउँ बस्ने ४५ वर्षीय शुभ नारायण यादवको मृत्यु भएको छ । दुर्घटनामा गम्भीर घाइते भएका उनको उपचारको लागि प्रादेशिक अस्पताल जनकपुरतर्फ लैजाने क्रममा बाटोमै मृत्यु भएको हो ।

स्कारपिओ चालकलाई प्रहरीले नियन्त्रणमा लिएको छ । दुर्घटनास्थलमा तत्काल खटिएको स्थानीय प्रहरीले उद्धार एवं दुर्घटनाका सम्बन्धमा आवश्यक अनुसन्धान गरिरहेको छ ।