हाँडीगाउँबाट घरबेटीकी छोरीलाई नशालु पदार्थ खुवाई बलात्कार गर्ने युवक पक्राउ

१२ चैत, काठमाडौं । काठमाडौंको हाँडीगाउँबाट प्रहरीले घरबेटीकी छोरीलाई नशालु पदार्थ खुवाई बलात्कार गरेको आरोपमा एक युवकलाई पक्राउ गरेको छ । बाँकेको नेपालगञ्ज उपमहानगरपालिका-२० राँझा घर भएकी १९ वर्षीया युवतीलाई होमस्टेमा पुर्‍याई नशालु पदार्थ खुवाएर बलात्कार गरेको आरोपमा २४ वर्षीय मिमबहादुर बुढालाई प्रहरीले पक्राउ गरेको हो ।

प्रहरीका अनुसार पक्राउ परेका बुढा हुम्लाको सर्केगाड गाउँपालिका-१ घर भई दस वर्षदेखि युवतीको नेपालगञ्जस्थित घरमा भाडामा बस्दै आएका थिए। बुढाले पीडितकी आमासँग गत मंसिर ५ गते ‘हामी सँगै घुम्न जान्छौं’ भनेर बाँकेको बैजनाथ गाउँपालिका-१ गाभर भ्यालीको होमस्टेमा लगेका थिए।

प्रहरीका अनुसार त्यहाँ पुगेपछि उनले जुसमा लागुऔषध नाइट्राजेपाम राखेर खुवाएका थिए। युवती बेहोस भएपछि उनले बलात्कार गरेको प्रहरी अनुसन्धानमा देखिएको छ।

ती युवतीलाई मंसिर ६ गते अचेत अवस्थामै घरमा लगेर छोडेपछि उनी बेत्तपा भएका थिए। युवतीको भेरी अस्पताल नेपालगञ्जमा उपचार भएको थियो। बुढाको खोजी गर्ने क्रममा प्रहरीले चैत ८ गते काठमाडौंको हाँडीगाउँबाट उनलाई पक्राउ परेको गरिएको प्रहरीले जनाएको छ।