घरबाटै बेपत्ता झा दम्पतीको शव बोराभित्र माटोमुनि पुरिएकाे अवस्थामा फेला

१२ चैत, महोत्तरी । महोत्तरीमा गत फागुन १० गते राती घरबाटै बेपत्ता पारिएका महोत्तरीको पिपरा गाउँपालिकाका झा. दम्पतीको शव फेला परेको छ । जिल्लाको पिपरा गाउँपालिका वडा नम्बर–५ सहोड़वाबाट अपहरित ६५ वर्षीय मुसाफिर झा र उनकी ५८ वर्षीया श्रीमति गीतादेवी झाको शव महोत्तरीकै पिपरा गाउँपालिका–२ स्थित अतरार जाने बाटोमा बोराभित्र माटोमुनि पुरिएर राखेको अवस्थामा फेला परेको हो ।

दुईवटा बोरामा हत्या गरेर माटो मुनि पुरिएको अवस्थामा दुबैजनाको शव बरामद भएको जिल्ला प्रहरी कार्यालय महोत्तरीले जनाएको छ ।दुबै शवको शरीरको हड्डीहरु मात्र देखिएको छ । खाल्डो खनेर निकालिएको शवको दम्पतिको छोरा बुहारीले सनाखत गरेका छन् । गीतादेवीले लगाएको कपडा, पोते र चुराका आधारमा परिवारजनले दुबै शवको पहिचान गरेको छ ।

यसअघि दम्पतिको अपहरण गरेको भन्दै प्रहरीले चार जनालाई पक्राउ गरेको छ । पिपरा गाउँपालिका–५ सहोडवा बस्ने ५२ बर्षीय रामबाबु यादव, उनका छोराहरु २६ बर्षीय सुरेन्द्र यादव र २४ बर्षीय राजेन्द्र यादव र पिपरा– ६ बस्ने भारतीय नागरिक ५० बर्षीय हरेन्द्र ठाकुर पक्राउ परेका छन् । उनीहरुविरुद्ध चैत ५ गते झाको परिवारले अपहरण गरी शरीर बन्धकसम्बन्धी मुद्दामा किटानी जाहेरी दिएको थियो ।