ओलीको संसदीय दल र नेपाल-खनालपक्षको केन्द्रीय समिति बैठक बस्दै

१३ चैत,काठमाडौं । नेकपा एमाले भित्र दुवै पक्षले एकै दिन दुई फरक- फरक बैंठक बोलाएका छन् । एमालेको नेपाल–खनाल पक्षले  विहान  ११ बजेका लागि केन्द्रीय कमिटी बैठक बोलाएको छ। यता ओली पक्षले आज दिउसो संसदीय दलको बैठक बोलाएको छ।

नेपाल खनाल पक्षको केन्द्रीय कमिटि बैठक कलंकीको एक पार्टी प्यालेसमा बस्ने तयारी छ भने ओलीले बोलाएको संसदीय दलको बैठक प्रधानमन्त्री निवास बालुवाटारमा बस्दै छ । नेपाल खनाल पक्षको केन्द्रीय कमिटि बैठकमा उपत्यकामा उपलब्ध केन्द्रीय सदस्यलाई बोलाइएको छ। पार्टीभित्र अहिले देखिएको विवादमा अब कसरी अघि बढ्ने भन्ने विषयमा छलफल गर्न बैठक बोलाइएको नेताहरुले बताएका छन् ।

नेपाल– खनाल पक्षका सबै नेताका पद र जिम्मेवारी खोस्दै अध्यक्ष ओलीले गृहमन्त्री रामबहादुर थापासहित माओवादी केन्द्रका २३ नेतालाई एमालेको केन्द्रीय सदस्य बनाएका छन्। यो  निर्णय अवैधानिक भन्दै नेपाल–खनाल पक्षले समानान्तर कमिटी गठन गरिरहेको  छ भने  ओली पक्षले राखेका केन्द्रीय समिति तथा संसदीय दलको बैठक बहिष्कार गर्दै आएको छ । सर्वोच्च अदालतले दुई दल मिलेर बनेको नेकपा अवैधानिक भन्दै पहिलेकै एमाले र माओवादी केन्द्र कायम गर्ने फैसला गरेपछि एमालेमा तीव्र विवाद सुरु भएको छ।