नेपाल, प्रचण्ड र खनालबीच गोप्य वार्ता

१३ चैत, काठमाडौं । नेकपा एमालेका नेता माधवकुमार नेपाल र झलनाथ खनालले माओवादी केन्द्रका अध्यक्ष पुष्पकमल दाहाल ‘प्रचण्ड’सँग गोप्य भेटवार्ता गरेका छन्। शुक्रबार बिहान कोटेश्वर स्थित महादेवस्थानमा रहेको एक व्यवसायीको घरमा खनाल–नेपाल र प्रचण्डबीच गोप्य वार्ता भएको हो । उनीहरुबीच आज बिहान साढे ८ बजेदेखि पौने १० बजेसम्म भेटवार्ता भएको बताइएको छ ।

एमालेका अध्यक्ष एवं प्रधानमन्त्री केपी ओलीले पार्टी विधान विपरीत निर्णयहरु गरेर आफहरुलाई गलहत्याउने कोशिश गरेको निष्कर्ष निकालेका नेपाल र खनालले प्रचण्डलाई भेटेका हुन्।

ओलीले भने नेकपा एमालेमा आइसकेपछि पनि उनीहरुले प्रचण्डसँगको भेटलाई निरन्तरता दिनु शंकास्पद रहेको बताउँदै आएका छन्। नेता नेपालसहित चार जना नेताले ओलीले आफूहरुलाई सोधेको स्पष्टीकरण विधान विपरीत भएको निष्कर्ष निकाल्दै त्यसको जबाफ नदिई बरु उल्टै दर्जनौ प्रश्नसहित ओलीलाई स्पष्टीकरण सोधेका छन्।

फागुन २३ गते सर्वोच्च अदालतले विवादै विवादका कारण फुटको संघारमा पुगेको नेकपा भंग गरेर नेकपा एमाले र नेकपा माओवादी केन्द्र ब्यूँताइदिएको थियो। सर्वोच्च अदालतको फैसलासँगै नेपाल र खनालले प्रचण्डलाई त्यागेर ओलीविरुद्ध पार्टीभित्रै संघर्ष गर्ने भन्दै एमालेमै फर्किएका थिए।