देउवाको ओली मोह: पत्रकार महासंघ र सत्ता राजनीति सम्बन्ध

१३ चैत, काठमाडौं । प्रधानमन्त्री केपी ओलीले पुष ५ गते प्रतिनिधिसभा विघटन गरेपछि देशको राजनीतिले कुन दिशा लिएको छ भन्ने अनुमान गर्न धेरैलाई गाह्रो परेको छ । फागुन ११ गते सर्वाेच्च अदालतले विघटन बदर गरेयता थोरै प्रष्ट भएको मुलुकी राजनीति फेरि फागुन २३ गतेको अर्काे विवादास्पद फैसलाले अन्योलग्रस्त बनाइदिएको छ ।

प्रधानमन्त्री ओलीको कार्यशैली र प्रवृत्तिले थिलथिलो भएको राजनीतिक परिदृश्यले निकास पाउने अवस्था्मा फागुन २३ गतेको फैसला तगारो बन्न पुग्यो । उक्त फैसलाले निकास दिने अन्तिम अवस्थाबाट मुलुक फेरि पुरानै अवस्थामा फर्किको छ । नेकपा नामको विवाद सल्टाउने नाममा सर्वाेच्च अदालतले राजनीतिक अस्थिरता बढाएको छ । अब ओलीको राजनीतिक भविष्य सुरक्षित मात्र होइन, थप आतंककारी बन्न पुगेको छ ।

सत्ता जोगाउन ओलीले जस्तोसुकै सम्झौता गर्ने संकेत गरेका छन् । साथै, ब्यूँतिएको प्रतिनिधिसभालाई बेकामे बनाउने उनको मनसाय प्रष्ट भइसकेको छ । आफैंले हत्या गरेको प्रतिनिधिसभालाई सकृय बनाउने ओलीको कुनै मनसुवा देखिंदैन । त्यसका लागि उनी फेरिपनि विघटनको तानाबुना बुन्दैछन् । यो महान जिम्मेवारी पूरा गर्ने सजिलो हतियार बन्दैछ– प्रमुख प्रतिपक्षी दल नेपाली कांग्रेस ।

पुष ५ को कदमलाई पार्टी केन्द्रीय कार्यसमितिले गैरसंवैधानिक र प्रजातन्त्र विरोधी भन्यो । तर ओलीको कदमविरुद्ध आन्दोलन गर्न भने सभापति शेरबहादुर देउवाले खुट्टा कमाए । प्रचण्ड–माधव पक्षले ओली विरुद्ध प्रदेशहरुमा अविश्वास प्रस्ताव दर्ता गराए, तर कांग्रेसकै अलमल र अन्योलले परिस्थिति नै फेरियो ।

फागुन २३ गतेको फैसला आउनु अघि नै कांग्रेसले प्रष्ट धारणा बनाइदिएको भए अहिले प्रदेश नं १ र बाग्मती प्रदेशको सरकार बदली सक्थे । सभापति देउवाको झुकाव ओली सरकार टिकाउनेमै बढी केन्द्रित रहेको धेरैले आक्षेप लगाएको विस्तारै पुष्टि भएको पाइन्छ । सभापति देउवाले प्रष्ट धारणा नबनाएकाले अहिले कांग्रेसको हातमा आइसकेको बाग्डोर फेरि ओलीतिरै फर्किएको छ ।

देउवाको यस्तो प्रवृत्ति विरुद्ध उनी निकट नेताहरु नै आजित भएका छन् । तर कसैले खुलेर विरोध गरिसकेका भने छैनन् । उपसभापति विमलेन्द्र निधि भने देउवाको पछिल्ला गतिविधिलाई नजिकबाट नियाली रहेका छन् । उनले निकटहरुसँग भन्न थालेका छन्–सभापति नै ओली जोगाउन कस्सिएपछि कसको के लाग्छ र ?

सभापति देउवाको ओली मोह पछिल्लो अवस्थामा अझै छताछुल्ल भएको छ । त्यो पनि राज्यको चौथो अंगका रुपमा रहेको पत्रकारको महाधिवेशनका सन्दर्भमा । दुनियाँले ओलीको काम र प्रवृत्तिको उछित्तो काढेका छन् । सत्तामा पुगेपछि ओलीमा अहंकार र सत्ता उन्माद चुलिएको धेरैको ठम्याई छ ।

ओलीले मिडिया काउन्सिल लगायत धेरै स्वतन्त्र प्रेस विरोधी कानून ल्याउने प्रयत्न गर्दा सिंगो प्रेस जगत् आन्दोलित भयो । नेपाली कांग्रेसले समेत त्यसको खुलेर विरोध गरेको हो । तर अहिले महासंघको आसन्न महाधिवेशनको मुखैमा भने देउवा – ओली चोचोमोचो फेरि चर्चाको विषय बनेको छ । लोकतन्त्र र स्वतन्त्र पत्रकारिता विरोधी छवि बनाएका ओलीसँग मिलेर महासंघ निर्वाचनमा साँठगाँठ गर्ने सोच कसरी तयार भयो ? त्यो नै विचित्रको अवस्था हो ।

लोकतन्त्र र संघीयता नै धरापमा पार्ने प्रवृत्तिलाई बढावा दिने गरी ओली देउवाको साँठगाँठलाई कांग्रेस निकट पत्रकारहरुले नै विरोध गरेका छन् । महासंघको निर्वाचन तालिका प्रभावित हुने गरी ओली पक्षको प्रेस चौतारीसँग मिल्न देउवाले दबाब दिन थालेको भन्दै युनियन निकट पत्रकारहरुले विरोध जनाएका छन् । साथै, प्रतिगमनका मतियारका रुपमा रहेको ओली प्रवृत्तिको साथ र समर्थनमा कुनै साँठगाँठ नगर्ने धारणा सार्वजनिक गरिरकेका छन् ।

अहिलेको अवस्थामा ओलीको प्रतिगमन विरुद्ध सडक आन्दोलनका साथीहरुसँगै मिलेर अगाडि बढ्दा लोकतन्त्र र जनमतको कदर हुने उनीहरुको भनाई देखिएको छ । युनियन आवद्ध धेरै नेताहरुको यस्तो धारणा आएकाले देउवा अलि हच्केका छन् । तर उनको प्रयास भने अझै ओली निकट चौतारीसँगै लगनगाँढो कस्यिोस् भन्ने देखिन्छ ।

प्रेस चौतारी पक्षले युनियनसँग मिलेर माओवादी र माधव पक्षलाई सोत्तर बनाउने चाहेको छ । तर त्यसका लागि युनियनसम्बद्ध अधिकांश नेताहरु अवरोधका रुपमा खडा भएका छन् । त्यसैले चौतारी पक्ष अहिले निर्वाचन प्रकृया नै भाँड्न उद्यत् देखिएको छ । तर ओलीसँगको देउवा मोह कसरी टुटाउने भन्ने प्रश्न चाहिं गम्भिर छ ।

यसपाला देउवाको मनोकाँक्षा पूरा भएन भने अरु मुद्धामा समेत ओलीसँगको सामिप्यता टुट्न सक्ने देखिन्छ । पत्रकार महासंघको निर्वाचन प्रकरणमा ओलीसँग लगनगाँठो कस्सिएन भने त्यसको प्रभाव सत्ता राजनीतिसँग समेत जोडिन सक्ने अनुमान गरिंदैछ । त्यसको छिनोफानो अबको केही घण्टामै हुने अवस्था रहेको छ ।