नेपाल पक्षको केन्द्रीय कमिटी बैठक सकिएपछि सांसद छलफलमा

१३ चैत, काठमाडौं । नेकपा एमालेको झलनाथ खनाल र माधवकुमार नेपाल पक्षको केन्द्रीय कमिटी बैठक भर्खर सकिएको छ । कलंकीको मेगा पाटी प्यालेसमा भएको बैठकमा नेता नेपाल र सुरेन्द्र पाण्डेले वर्तमान परिस्थितिबारे ब्रिफिङ गरेका थिए ।

बैठकमा पार्टीले सोधेको स्पष्टीकरणको जवाफ र अध्यक्ष केपी ओलीले चाल्न सक्ने आगामी कदमपछिको रणनीतिबारे जानकारी गराएका थिए । केन्द्रीय कमिटी बैठक सकिएपछि सांसद छलफल सुरु भएको छ । केन्द्रीय समिति बैठक सकिएपछि सांसद नरहेका नेताहरु बैठक हलबाट बाहिरिएका छन् ।

सांसद सँगको परामर्शपछि बालुवाटारमा प्रधानमन्त्री तथा पार्टी अध्यक्ष ओलीले बोलाएको संसदीय दलको बैठक जाने र नजानेबारे निर्णय लिनेछ । ओलीले दिउँसो ३ बजेका लागि संसदीय दलको बैठक बोलाएका छन् ।

उक्त बैठकमा नेता नेपालले भने आफू सहभागी नहुने बताएका छन्। शुक्रबार बिहान माधवकुमार नेपाल र झलनाथ खनालले माओवादी केन्द्रका अध्यक्ष पुष्पकमल दाहाल ‘प्रचण्ड’सँग गोप्य भेटवार्ता गरेका थिए।