चौधरीलाई भेट्न कारागार पुगे महेश

१३ चैत, काठमाडौं । एमाले सांसद महेश बस्नेतले डिल्लीबजार कारागारमा पुगेर निलम्बित सांसद रेशम चौधरीलाई भेटेका छन् । एसएसपी लक्ष्मण न्यौपानेसहितको टीकापुर हत्याकाण्डका मुख्य आरोपी चौधरीलाई भेट्न बस्नेत शुक्रबार बिहान कारागार पुगेका हुन्।

समाजवादी पार्टीसँग सत्ता साझेदारीका लागि प्रधानमन्त्री केपी ओलीले कुराकानी अघि बढाइरहेका बेला बस्नेतले चौधरीलाई आज कारागारमै गएर भेटेका हुन्। संविधान संशोधनसहित टीकापुर हत्याकाण्डका आरोपीलाई रिहा गर्नुपर्नेलगायत माग जसपाको छ।

चौधरीको रिहाइ र संविधान संशोधन विषय अगाडि बढे ओलीसँग साझेदारी गर्न जसपाका नेता महन्थ ठाकुर र राजेन्द्र महतो सकारात्मक देखिएका छन्।

चौधरीलाई जिल्ला अदालत कैलाली र उच्च अदालत दीपायलले जन्मकैद हुने फैसला गरेको थियो। सो मुद्दा अहिले सर्वोच्च अदालतमा विचाराधीन छ। भेटमा सांसद चौधरीले प्रधानमन्त्री ओलीले नै पार्टीको एजेन्डालाई सम्बोधन गर्न सक्ने भएकाले आफूहरू सकारात्मक भएको प्रतिक्रिया दिएका थिए।