ओलीले बोलाएको संसदीय दलको बैठक सुरु

१३ चैत, काठमाडौं । नेकपा एमाले संसदीय दलको बैठक बालुवाटारमा सुरु भएको छ । पार्टी अध्यक्ष एवम् प्रधानमन्त्री केपी ओलीले बोलाएको संसदीय दलको बैठकमा माधव नेपाल समूहका नेतासमेत सहभागी हुन बालुवाटार पुगेका छन् ।

वरिष्ठ नेता झलनाथ खनालसहितका नेता बालुवाटार पुगेका हुन् । पार्टी अध्यक्ष ओलीले विधान विपरित काम गरेको भन्दै बैठकमा नजाने अडान लिएका नेपाल समूहका नेता शुक्रबार बालुवाटार बैठकमा गएका हुन् । बैठकअघि बसेको केन्द्रीय कमिटीका सदस्यको बैठकले संसदीय दलको बैठकमा जाने निर्णय गरेको हो ।

नेपाल र खनाल नेपाल समूहले आफ्ना अडानलाई यतावत राख्दै संसदीय दलको बैठकमा जाने निर्णय गरेको रघुजी पन्तले जानकारी दिए । बैठकमा को जाने वा नजाने भन्ने विषयमा छलफल नभएको तर बैठकमा गएर आफ्ना कुरा राख्ने निर्णय भएको उनको भनाइ छ ।

नेपाल–खनाल केन्द्रीय कमिटी बैठकले संसदीय दलको बैठकमा गएरै अडानलाई कायम राख्ने निर्णय गरेको हो । विधानविपरित भएका निर्णय खारेज नभएसम्म पार्टी अध्यक्ष एवम् संसदीय दलका नेता ओलीसँग सहमति नहुने निष्कर्ष बैठकको छ ।