संसदीय दलको बैठकमा भीम रावल नजाने

१३ चैत, काठमाडौं । नेकपा एमालेका वरिष्ठ नेता माधवकुमार नेपाल र झलनाथ खनाल पक्षले संसदीय दलको बैठकमा सहभागी हुने निर्णय गर्दै स्थायी कमिटी, पोलिटब्युरो र केन्द्रीय कमिटीको माग गर्ने भएको छ ।

खनाल–नेपाल समूहको शुक्रबार कलंकीमा भएको केन्द्रीय सदस्यहरुको बैठकले २०७५ जेठ २ गतेको स्थायी कमिटी, पोलिटब्युरो र केन्द्रीय कमिटीको बैठक बोलाउन माग गर्ने लिखित माग गर्ने निर्णय गरेको हो । त्यसका अलवा संसदीय दलको बैठकमा जाने र नोट अफ डिसेण्ट लेख्ने भएको छ ।

सर्वोच्च अदालतले नेकपा खारेज गर्दै एमाले र माओवादी केन्द्र ब्युँताउने फैसला गरेपछि नेपाल–खनाल पक्षले एकता अगाडिकै कमिटीको बैठक बोलाउन माग गर्ने भएको हो । ‘हामीले २०७५ जेठ २ गतेको कमिटीहरुको बैठक बोलाउनका लागि लिखित रुपमा माग गर्ने निर्णय गरेका छौँ’, केन्द्रीय सदस्य जगन्नाथ खतिवडाले भने । कमिटीको बैठक राख्नका लागि २५ प्रतिशत सदस्यले लिखित आग्रह गर्नुपर्ने हुन्छ ।

केन्द्रीय सदस्य खतिवडाले पार्टी एकतालाई जोगाउनका लागि संसदीय दलको बैठकमा सहभागी हुने निर्णय गरेको बताए । केन्द्रीय समिति बैठकपछि नेपाल–खनाल पक्षधर सांसदहरुको छुट्टै बैठक बसेको थियो । तर भीम रावल भने संसदीय दलको बैठकमा नजाने भएका छन् । उनले संसद भवन वा सिंहदरवारमा बैठक राखेमात्रै जाने बताउदै आएका छन् ।