विश्वका प्रदूषित शहरको सूचीमा काठमाडौं एक नम्बरमा, मौसम धुम्म !

१३ चैत, काठमाडौं । विश्वका प्रदूषित शहरको सूचीमा काठमाडौं एक नम्बरमा परेको छ । प्रदूषण मापन गर्ने आईक्यूएयर डट कमले सार्वजनिक गरेको सूचीमा काठमाडौं एक नम्बरमा परेको हो। काठमाडौंको एक्यूआई २७७ पुगेको छ। महाशाखाका अनुसार  भक्तपुर, कीर्तिपुर र ललितपुरको भैंसेपाटीमा पनि प्रदुषण झन् धेरै देखिएको छ।

दोस्रो प्रदूशित शहरको सूचीमा चीनको राजधानी बेइजिङ छ। बेइजिङको एक्यूआई १८७ रहेको छ। यस्तै तेस्रो नम्बरमा भारतको मुम्बई, चौथोमा बंगलादेशको ढाका, पाँचौँमा चीनको शेङ्याङ, छैटौँमा दक्षिण कोरियाको इन्चोन, सातौँमा पोल्याण्डको वार्सा, आठौँमा चीनको वुहान, नवौंमा पोल्याण्डको र दशौँमा बुल्गेरियाको सोफिया रहेको छ।

शुक्रबार काठमाडौं उपत्यकाको आकाश धुँवाले ढाकिएको छ। वायुमा धुँवा मिसिएका कारण काठमाडौंको मौसम धुम्म देखिएको मौसमविद्ले बताएका छन्। यता, मौसम पूर्वानुमान महाशाखाले काठमाडौंको आकाशमा रहेको तुवाँलोले आँखा पोल्ने समस्या देखिएको बताएको छ । काठमाडौं र आसपासको आकाशमा तुवाँलो लाग्ने समस्या तीन दिनदेखि देखिए पनि आज शुक्रबार बाक्लो तुवाँलो लागेको महाशाखाले जनाएको छ ।

पर्सा वन्यजन्तु आरक्ष, चितवन राष्ट्रिय निकुञ्ज तगा मकवानपुर, प्रदेश १ तथा देशका विभिन्न क्षेत्रका जंगलमा डढेलो लागेकोले काठमाडौं र आसपासको आकाश तुवाँलोले ढाकिएको छ । भारतको उत्तरप्रदेश, हरियाणा क्षेत्र पनि धुलोले ढाकेको छ । हावाले सो क्षेत्रको धुलो उँडाएर नेपालतर्फ ल्याएको छ । पानी पर्न न्युन चाप भएको हावाले बादल ल्याउनुपर्ने भएपनि धुलोको कण र धुवाँ लिएर आएकोले यस्तो भएको बताइएको छ । मौसमविदहरुले हावा चलेपछि प्रदुषण कम हुने अनुमान गरेका छन् ।