नेताहरुद्वारा दु:ख व्यक्त,कांग्रेसले बोलायो आकस्मिक बैठक

१३ चैत, काठमाडौं । कांग्रेस नेता नवीन्द्रराज जोशीको निधनमा कांग्रेस सभापति शेरबहादुर देउवा लगायतका नेताहरुले दु:ख व्यक्त गरेका छन् । नेताहरुले सामाजिक सञ्‍जाल मार्फत जोशीप्रति श्रद्धाञ्जली अर्पण गर्दै जोशीको निधनको खबरले आफू मर्माहित भएको भन्दै निधनप्रति गहिरो दुःख एवम् संमवेदना प्रकट गरेका छन् ।

“नेपाली कांग्रेसका नेता, कुशल संगठक एवंम पूर्वमन्त्री नविन्द्रराज जोशीको असामायिक निधनको खबरले निकै मर्माहित भएको छु । जोशीजीको निधनले कांग्रेसले एक इमान्दार र निष्ठावान नेता गुमाएको छ । उहाँको आत्माको चीर शान्तिको कामना गर्दै शोकाकुल परिवारजनमा हार्दिक समवेदना व्यक्त गर्दछु। देउवाले टुइट् गरेका छन् ।

यसै गरी नेपाली कांग्रेस बरिष्ट नेता रामचन्द्र पौडेलले शुक्रबार राति सामाजिक सञ्जालमा लेख्दै भनेका छन् । ‘आम जनताका ढुकढुकी लोकप्रिय नेता जोशीको निधनको खबरले मर्माहत बनाएको’ बताएका छन्।‘नेपाली कांग्रेसका भरोसायोग्य नेता जोशी राजनीतिक मात्र नभएर उच्च सामाजिक भावना भएका नेता गुमाउँदा म पीडा सहन नसक्ने अवस्थामा छु’

यसै बीच केन्द्रीय कार्यसमितिको आकस्मिक बैठक बोलाएको छ । बैठक पार्टीको केन्द्रीय कार्यालय सानेमा भोली विहान ११ ः३० बजे बोलाइएको पार्टी कार्यालयले जानकारी दिएको छ।  मध्याह्न १२.०० बजेदेखि २.०० बजेसम्म स्व जोशिको पार्थिव शरीर पार्टीको केन्द्रीय कार्यालयमा श्रद्धाञ्जलीका लागि राखिने भएको छ ।

केही हप्तादेखि काठमाडौंको नर्भिक अस्पतालमा उपचाररत जोशीको शुक्रबार साँझ निधन भएको हो।