रेडपाण्डा र चितुवाको छालासहित आठ जना पक्राउ

१४ चैत, सुर्खेत । दैलेख प्रहरीले रेडपाण्डा र चितुवाको छालासहित आठ जनालाई पक्राउ गरेको छ । प्रहरीले उनीहरूलाई नारायण नगरपालिका–३, खुर्सानीबारीबाट शनिबार पक्राउ गरिएको हाे । टोलीले शनिबार नौमुलेबाट दैलेख बजारतर्फ वन्यजन्तु ओसारपसार गरिरहेको भन्ने गोप्य सूचनाको आधारमा उनीहरुलाई नियन्त्रणमा लिएको हो ।

पक्राउ पर्नेमा नौमुले गाउँपालिका–३ का ५१ वर्षीय धनबहादुर मगर र २२ वर्षीय दलबहादुर खत्री, सोही गाउँपालिका वडा नम्बर १ का ३३ वर्षीय कविराम अधिकारी, वडा नम्बर २ का ३३ वर्षीय धनबहादुर पुरी, ४५ वर्षीय हस्तबहादुर थापा र ५६ वर्षीय धनबहादुर रावत, वडा नम्बर ४ का १९ वर्षीय रोशन बस्नेत र भगवतीमाई गाउँपालिका–१ का २७ वर्षीय गोविन्द थापा रहेका छन् ।

प्रहरीका अनुसार उनीहरुलाई कर्णाली प्रदेश ०२– ००१ ज ००३६ नम्बरको डबल क्याप बोलेरो जीपमा नौमुले–२ बाट दैलेख बजारतर्फ आइरहेको अवस्थामा नियन्त्रणमा लिइएको हो । उनीहरूको साथबाट ३ फिट ३ इन्च लम्बाइ र ११ इन्च चौडाइ भएको रातो कालो रङको रेडपाण्डाको छाला, ५ फिट ९ इन्च लम्बाइ र १ फिट ५ इन्च चौडाइ भएको चितुवाको छाला बरामद गरिएको प्रहरीले जनाएको छ ।

यस्तै, रेडपाण्डाको जस्तो देखिने ३ फिट लम्बाइ र १ फिट ६ इन्च गोलाइ भएको छाला र ३ फिट १ इन्च गोलाइ भएको रेडपाण्डाको जस्तो देखिने सिलाएको छाला पनि बरामद गरिएको छ। पक्राउ परेकाहरुमाथि थप अनुसन्धान थालिएको प्रहरीले जनाएको छ ।