पत्रकारहरु नयाँ योजना अनुसार अगाडी बढ्न आवश्यक : कानून मन्त्री चुमान

मिना कंडेल 

१५ चैत, नवलपुर । गण्डकी प्रदेशका कानून मन्त्री हरिबहादुर चुमानले राष्ट्रको चौँथो अगंको रुपमा रहेको संचार क्षेत्र र पत्रकारहरुको क्षमतावृद्धि सगै नयाँ योजना अनुसार अगाडी बढ्न आवश्यक रहेको बताएका छन् ।

नेपाल आदिवासी जनजाती पत्रकार महासंघ फोनिज गण्डकी प्रदेशको आयोजनामा नवलपुरको कावासोती १५ स्थित अमलटारी मध्यवर्ती सामुदायिक होमस्टे गाउँ बाघखोरमा शनिबारदेखि भएको सूचना प्रविधिको विकास अबको पत्रकारिता विषयक बृहत अन्तरक्रिया कार्यक्रमको उद्घाटन पछि बोल्दै मन्त्री चुमानले समयसँगै पत्रकारहरु पनि विकसित प्रविधिको प्रयोगमा लाग्नु पर्नैमा जोड दिए ।

उनले भने “प्रदेश सरकारले नयाँ सोच र योजना अनुसार अगाडी बढेर कार्यक्रम गरे प्रदेश सरकार दिन तयार रहेको छ ।” आफ्नो मन्त्रालयले कानून, गृह मन्त्रालय र संचार मन्त्रालयको समेत काम गर्ने भन्दै उनले नयाँ बजेट निर्माण सुरु भएको बताए ।

यस्तै दुईदिने कार्यक्रम अन्र्तगत पहिलो दिन शनिबार सूचना प्रविधिको विकास अबको पत्रकारिता विषयक अन्तरक्रिया गरिएको थियो भने दोस्रो दिन आईतबार नवलपुरको पर्यटनका सम्भावनाको खोजि र त्यसको विकासका लागि भईरहेका पहलवारे स्थानीय तहका प्रमुखहरुसग अन्तरक्रिया सम्पन्न गरिएको हो ।

प्रदेशका ११ जिल्लाबाट पत्रकारहरुको सहभागिता रहेको कार्यक्रममा गण्डकी प्रदेश सांसद कांग्रेस नेता कृष्णचन्द्र नेपाली, गण्डकी प्रदेश सांसद विष्णु लामिछाने , गण्डकी प्रदेश सभा सदस्य ओमकला गौतम ,गण्डकी प्रदेश सभा सदस्य रोशन गाहा, प्रमुख जिल्ला अधिकारी मनमाया पंगेनी भट्टराई, कावासोती नगरउपप्रमुख प्रेमशंकर मर्दनिया फोनिज लुम्विनी प्रदेश अध्यक्ष मिलन गाहा मगर लगायतले कार्यक्रममा बोलेका थिए ।

कार्यक्रममा प्रशिक्षक रजनिश भण्डारीले अवको पत्रकारमा मल्टिमिडियाको ज्ञान र प्रयोगको बारे शिक्षा हुनुपर्ने भन्दै त्यसो भएमात्र पत्रकारहरुलाई थप अवसर आउने बताए ।

समापन कार्यक्रममा बोल्दै अध्यक्ष आस्था मगरले अवको महासंघमा फोनिजको पनि बलियो उपस्थिति हुनुपर्ने र त्यसो हुन सके मात्रै पत्रकारिता समावेशी लोकतन्त्रको आधार हुने बताए ।

फोनिज गण्डकी प्रदेश अध्यक्ष एमबी आस्था मगरको सभापतित्वमा भएको कार्यक्रममा उपाध्यक्ष कमला रानाले स्वागत र महासिचव रुद्रसिं मगरले संचालन गरेका थिए ।

विशेषगरी यहाँ थारु सस्कृतीको अवलोकन, थारु परिकारका सवाद लिन र मध्यवर्ती क्षेत्रमा गैंडा लगाएतका वन्यजन्तु अवलोकनकालगि पर्यटकहरु आउने गर्दछन् ।