तीन लघुवित्तको संस्थापक शेयर लिलामी, कुनको कति कित्ता ?

१६ चैत, काठमाडौं । हाल बजारमा विभिन्न ३ वटा कम्पनीको लिलामी शेयर धमाधम बिक्री भइरहेको छ । फर्स्ट माइक्रोफाइनान्स लघुवित्त, मेरो माइक्रोफाइनान्स लघुवित्त र निर्धन उत्थान लघुवित्त वित्तीय संस्था लिमिटेडको संस्थापक शेयर बित्रीमा ल्याएको हो ।

फर्स्ट माइक्रोफाइनान्स लघुवित्त वित्तीय संस्था लिमिटेडले चैत ३ गतेदेखि २५ हजार कित्ता संस्थापक समूहको शेयर लिलाम बढाबढ गरी बिक्री गरिरहेको छ । लगानीकर्ताले न्यूनतम ५ हजार कित्ता र सो भन्दा बढीको लागि अधिकतम सम्पूर्ण कित्ताका लागि वैशाख ६ गतेसम्म आवेदन दिन सक्नेछन् ।

उक्त शेयरको न्यूनतम मूल्य १ सय रुपैयाँ तोकिएको छ । त्यसैले लगानीकर्ताले बोलपत्र पेश गर्दा सो वा सोभन्दा बढी मूल्य अंकित गरी बोलकबोल गर्नुपर्नेछ । उक्त शेयरको बिक्री प्रबन्धकमा मुक्तिनाथ क्यापिटल रहेको छ ।

मेरो माइक्रोफाइनान्स लघुवित्त वित्तिय संस्था लिमिटेड

एनआईसी एशिया बैंक लिमिटेडले आफ्नो स्वामित्वमा रहेको मेरो माइक्रोफाइनान्स लघुवित्त वित्तिय संस्था लिमिटेडको संस्थापक समूहको शेयर लिलाम बढाबढ गरी बिक्री गरिरहेको छ । बैंकले संस्थाको ५ लाख ८९ हजार ४ सय ३८ कित्ता शेयर प्रति कित्ता न्यूनतम मूल्य ४ सय ३७ रूपैयाँमा बिक्री खुल्ला गरेको हो ।

उक्त शेयरहरू खरिद गर्न इच्छुक संस्थापकहरू वा जो कोही व्यक्ति, कम्पनी, संघ, संस्थाहरूले न्युनतम १०० कित्ता र अधिकतममा १० ले भाग जाने गरि सबै कित्ताको लागि आवेदन दिन सक्नेछन् ।

संस्थाको निष्कासन तथा बिक्री प्रबन्धक एनआईसी एशिया क्यापिटल लिमिटेड रहेको छ । लगानीकर्ताहरुले एनआईसी एशिया क्यापिटल लिमिटेड, बबरमहल, काठमाडौंबाट आवेदन दिन सक्नेछन् ।

निर्धन उत्थान लघुवित्त वित्तीय संस्था लिमिटेड

निर्धन उत्थान लघुवित्त वित्तीय संस्था लिमिटेडले चैत्र १८ गते, बुधबारदेखि एक लाख ८ हजार ५ सय ४२ कित्ता संस्थापक शेयरहरू लिलाम बढाबढ गरि बिक्री गर्ने भएको छ ।

उक्त शेयरहरू खरिद गर्न इच्छुक संस्थापकहरू वा जो कोही व्यक्ति, कम्पनी, संघ, संस्थाहरूले वैशाख २१ गतेभित्र न्यूनतम २ हजार कित्तादेखि अधिकतममा सम्पूर्ण कित्ताका लागि निष्कासन तथा बिक्री प्रबन्धक एनआइबिएल एस क्यापिटल लिमिटेड, लाजिम्पाट, काठमाडौँमा आइपुग्ने गरि आवेदन पेश गर्न सक्नेछन् । उक्त सेयरको न्यूनतम मूल्य ५ सय ५० रूपैयाँ तोकिएको छ । आवेदकले सो वा सोभन्दा बढी मूल्य अंकित गरी बोलकबोल गर्नु पर्नेछ ।