होली खेल्ने क्रममा पानी सम्झेर एसिड छ्याप्दा तीनजना घाइते !

१६ चैत, काठमाडौं । काठमाडौंको साँखुमा होली खेल्ने क्रममा छ्यापेको एसिडले तीनजना घाइते भएका छन् । होली खेल्ने क्रममा पानी सम्झेर डेरीमा राखेको एसिड छ्याप्दा तीनजना घाइते भएको प्रहरीले जनाएको छ ।

शंखरापुर नगरपालिका-१ मा होली खेल्ने क्रममा उसिड छ्याप्दा १६ वर्षीया किशोरी र ११ र ९ वर्षका बालक घाइते भएका हुन् । किशोरीको अनुहार र दुवै बालकको हातमा एसिड परेको थियो । उनीहरुको सुस्मा कोइराला मेमोरियल अस्पतालमा उपचार भइरहेको छ ।

घटनामा संलग्न भएको आरोपमा प्रहरीले १७ वर्षका पवन पहाडी र १८ वर्षका आकास तामाङलाई पक्राउ गरेको छ । प्रहरीका अनुसार डेरीमा दुधको फ्याट नाप्न प्रयोग हुने एसिड ग्यालिनमा थियो । होली खेल्दै डेरीमा पुगेका युवाहरुले पानी माग्दा ग्यालिनमा भएको एसिड परेको बताइएको छ ।