प्रदूषणबाट बालबालिकालाई बचाउन विद्यालय बन्द गर्ने तयारी

१६ चैत, काठमाडौं । सरकारले वायु प्रदूषणबाट बालबालिकालाई बचाउन विद्यालय बन्द गर्ने भएको छ । सरकारले वायु प्रदूषणबाट बालबालिकालाई बचाउन केही दिन विद्यालय बन्द गर्ने विषयमा छलफल गरिरहेको हाे । छलफलपछि छिट्टै यसबारे निर्णय गर्ने बालुवाटार स्रोतले जनाएको छ ।

हाल देशमा स्थानीय वायुसँगै पश्चिमी वायुकोसमेत आंशिक प्रभाव रहेको छ । विगत केही दिनदेखि काठमाडौं उपत्यकालगायत देशका विभिन्‍न भागमा एक्कासि देखिएको तुवाँलो अझै कायम रहने भएको छ ।

पछिल्लो समय नेपाल तथा भारतको केही स्थानमा लागेको डढेलोको कारण प्रदूषणको कण वायुमण्डलमा नै जम्मा भएकाले धेरैजसो स्थानमा प्रदूषण बढ्न गई तुवाँलो देखिएको हो ।