त्रिदेशीय कप फाइनल हेर्न टिकटको मूल्य वृद्धि !

१६ चैत, काठमाडौं । त्रिदेशीय कप फुटबलको फाइनल खेल हेर्न लागि टिकटको मूल्य वृद्धि गरेको छ । त्रिदेशीय कपको फाइनलमा सोमबार नेपाल र बंगलादेशबीच दशरथ रंगशालामा खेल हुँदैछ ।

यो खेल हेर्न भीआईपी प्याराफिटको टिकट मूल्य २ हजार र साधारण प्याराफिटको टिकट मूल्य १ हजार रुपैयाँ तोकिएको अखिल नेपाल फुटबल संघ एन्फाले जनाएको छ ।

यसअघि त्रिदेशीय कपको पहिलो चरणको खेल हेर्न भीआईपीतर्फ १५ सय र साधारणतर्फ ७ सय रुपैयाँ टिकट मूल्य राखिएको थियो ।
किर्गिस्तान यू(२३ टिमसमेत सहभागी प्रतियोगितामा बंगलादेश र नेपाल शीर्ष दुईमा रहँदै फाइनल पुगेका हुन् । फाइनल खेल नेपाली समयअनुसार साँझ साढे ५ बजे सुरु हुनेछ ।

समूह चरणमा नेपाल र बंगलादेशले गोलरहित बराबरी खेलेका थिए । समूह चरणको दुवै खेलमा गो गर्न नसकेको नेपाल फाइनलमा गोल गर्दै उपाधि जित्ने लक्ष्यका साथ मैदान उत्रदैँछ ।