प्रचण्ड–माधव भेटघाट

१६ चैत, काठमाडौं । नेकपा एमाले भित्रको शक्ति सन्तुलनमा कमजोर देखिएका वरिष्ठ नेता माधवकुमार नेपाल नयाँ राजनीतिक कोर्स तयार गर्न वाम एकताको मुद्धालाई फेरि महत्व दिन थालेका छन् ।

यसका लागि उनले नेपाल कम्युनिष्ट पार्टी माओवादी केन्द्रका अध्यक्ष पुुष्पकमल दाहाल प्रचण्डसँग हिमचिम बढाइरहेका छन् । यसै प्रसंगमा छलफल गर्न आज पनि नेताद्वय प्रचण्ड र नेपालबीच कोटेश्वरस्थित एकजना व्यापारीको घरमा वार्ता भइरहेको छ ।

स्रोतका अनुसार, एमाले अध्यक्ष केपी ओलीको निरंकुशता र हेपाहा शैलीका विरुद्ध संघर्ष गर्न नयाँ वाम शक्ति निर्माण गर्नुपर्नेमा नेताद्वय सहमत छन् । साथै, सर्वाेच्च अदालतको फागुन २३ को फैसलाले सिर्जना गरेको अन्योल र अस्थिर राजनीतिलाई गति दिन पुनराबलोकनमा जानेबारे पनि छलफल भइरहेको छ ।

फैसलाउपर चित्त नबुुझेको भन्दै माओवादी केन्द्रले यसअघि नै पुनराबलोकनमा जाने निर्णय गरिसकेको थियो । आज पुनरावलोकन दर्ता गर्ने तयारी गरेको माओवादी केन्द्रले बताएको थियो । नेताहरु अहिले पनि छलफलमै रहेको स्रोतको दाबी छ । कुरा मिल्यो भने आजै पुनरावलोकनमा जाने गरी सर्वाेच्चमा दर्ता हुन सक्छ–स्रोतले भन्यो ।