रेशम चौधरीलाई रिहा गर्न सरकारी कार्यदल गठन

१६ चैत, काठमाडौं । अन्ततः सरकारले सत्ता जोगाउन फौजदारी कसूर प्रमाणित रेशम चौधरीलाई रिहा गर्ने भएको छ । यस प्रयोजनका लागि गृहमन्त्री रामबहादुर थापाको संयोजकत्वमा सरकारले वार्ता टोली गठन गरेको छ । सरकारका प्रवक्तासमेत रहेका सूचना प्रविधि तथा सञ्चार मन्त्री पार्वत गुरुङले यस्तो निर्णय भएको जानकारी आज दिएका छन् ।

सरकारी वार्ता टोलीका सदस्यहरुमा प्रधानमन्त्रीका परराष्ट्र मामलासम्बन्धी सल्लाहकार डा. राजन भट्टराई र पूर्व सांसद् शान्ता चौधरी रहेका छन् । टोलीले तत्काल वार्ता गरी रेशमलाल चौधरी रिहा गर्ने तयारी थाल्ने बताइएको छ । जनता समाजवादी दलले चौधरीको रिहाईलाई ओली सरकारको समर्थन गर्ने न्यूनतम सर्त बनाएको छ ।

अब सरकार लचिलो ढंगले प्रस्तुत भएको छ, हामीलाई विश्वास छ सजपा पनि सरकारमा सहभागी हुनेछ–मन्त्री गुरुङले भने । ओली सरकारलाई दिइरहेको समर्थन अब फिर्ता लिने भन्दै माओवादी अध्यक्ष पुष्पकमल दाहाल ‘प्रचण्ड’ले खुलाएको भोलिपल्टै सरकारले यस्तो निर्णय लिएको हो ।

सरकारको निर्णयलाई जसपाले सकारात्मक भनेको छ । जसपा नेता राजकिशोर यादवका अनसार, अब ओली सरकारसँग वार्ता र सहमति गर्ने वातावरण तयार भएको छ । तर यतिकै भरमा सत्तामा गइहाल्ने भन्ने चाहिं होइन भन्दै उनले यसबारे पार्टी भित्र गहन छलफल गरिने बताए । सजपाले होली लगत्तै सत्ता साझेदारीबारे निर्णय लिने बताइसकेको छ ।