ओलीतन्त्र ढाल्ने कसरतमा वाम नेता

१७ चैत, काठमाडौं । धेरैलाई आश्चार्य लाग्ला – अबको केही दिन भित्रै पूर्व प्रधानमन्त्रीद्वय माधवकुमार नेपाल र डा. बाबुराम भट्टराईमाथि नयाँ दशा आइलाग्छ । ललिता निवास जग्गा प्रकरणमा उनीहरुविरुद्ध मुद्धा दायर मात्रै नभई थुनामै राखेर सुनुवाई नहोला भन्न सकिन्न । प्रधानमन्त्रीसमेत रहेका नेकपा एमाले अध्यक्ष केपी ओलीका पछिल्ला गतिविधि र अदालतबाट आउने फैसलाले त्यस्तै संकेत गरेको छ ।

बालुवाटार निकट स्रोत भन्छ– प्रधानमन्त्री ओली एमालेबाट माधव नेपाललाई मात्रै निकाल्न चाहन्छन् । उनको ध्येय जसरी भएपनि माधवलाई एमालेबाट लघार्नु रहेको छ । तर त्यसका लागि उनी धेरै नेतालाई कारबाही गर्ने पक्षमा छैनन् । अहिले नेता नेपाल र भीम रावललाई कारबाही गर्दा बाँकी तर्सने उनको विश्वास हो । तर नेपालले समानान्तर पार्टी संगठन गर्ने र एमालेलाई अफ्ठेरो पार्ने अवस्था भने रहिरहने ओली पक्षको ठम्याई रहेको छ । त्यसैले उनलाई कुनै फौजदारी कसुरमा फसाउन पाए राजनीतिक मुद्धा नै कमजोर हुने ओली पक्षको बुझाई हो ।

ओलीको यो मनसुवा पूरा गर्ने ठाउँ भनेको तत्काललाई यही मुद्धा नै हो । ललिता निवास प्रकरणमा मन्त्रिपरिषदको आडमा भएका नीतिगत फैसला उपर अख्तियार दुरुपयोग अनुसन्धान आयोगले मुद्धा नचलाउने भनेर दिएको उन्मुक्तिलाई चुनौती दिंदै सर्वाेच्च अदालतमा दायर मुद्धाको सुनुवाई थालिएको छ । उक्त मुद्धामा हिजो यसबारे भएका सबै निर्णयको सक्कल पठाउन सर्वाेच्चले मन्त्रिपरिषद सचिवालयलाई आदेश दिइसकेको छ ।

यो प्रकरणको उठान र परिस्थितिबारे धेरै खाले अनुमान लगाइएको छ । संसद् विघटनको विषयमा सर्वाेच्चले गरेको आदेशले खरानी भएका ओली एकाएक अर्काे मुद्धाको आदेशले फेरि भाले बनेका छन् । ओलीको भाले प्रवृत्तिको गति र मतिले अर्को स्वरुप धारण नगर्ला भन्न सकिन्न । अर्थात, अदालतले ओलीलाई राहत पुग्ने गरी फेरि अर्काे फैसला नगर्ला र ? भन्ने आधार बलियो छ ।

माधव नेपाललाई राजनीतिक रुपमा कारबाही गर्दा ओलीलाई दीर्घकालिन रुपमा धेरै घाटा हुन सक्छ । किनभने नेपालमाथि राजनीतिक पूर्वाग्रह राखेको आरोप ओलीमाथि लाग्ने छ । त्यसले ओलीको पार्टी संरचना नै अफ्ठेरो अवस्थामा पुग्न सक्ने देखिन्छ । तर नेपाललाई ललिता निवास प्रकरणमा फसाउन सक्दा सर्प पनि मर्ने र लठ्ठी पनि नभाँचिने अवस्था आउनेछ । त्यसैले जसरी भएपनि सर्वाेच्चले माधव र डा.भट्टराई विरुद्ध फैसला गरिदिओस् भन्ने आकांक्षा ओलीमा व्याप्त देखिन्छ ।

त्यसको संकेत नेपाल र डा. भट्टराईले पनि पाइसकेका छन् । अहिले ओली विरुद्ध सबैभन्दा चर्काे आवाज उठाउनेमा विपक्षमा डा. भट्टराई नै रहेका छन् । उनलाई समेत ठेगान लगाउन पाए समाजबादी जनता पार्टी भित्र आफ्नो प्रभाव जमाउन सकिने विश्वास ओलीमा रहेको छ ।ओलीले चालेको पछिल्ला कदम र अदालतबाट हुने गरेका आश्चार्यजनक आदेशले यस्तो आशंकालाई बल पु¥याएको हो ।

अदालतले यो प्रकरणमा नेपाल र डा. भट्टराईलाई दोषी नदेखाउला भन्न सकिन्न । ओलीले त विगतमा नै अख्तियारमार्फत नेपाल र भट्टराईमाथि मुद्धा चलाउन खोजेका थिए । तर तत्कालिन प्रमुख आयुक्त नवीनकुमार घिमिरेको अडानका कारण रोकिएको हो । यो सबै कुरा नेता नेपाललाई राम्रो जानकारी छ । त्यसैले राज्य संयन्त्रको दुरुपयोग गरेर ओलीले नेपाल र भट्टराईलाई जेलको हावा ख्वाउन बेर लगाउँदैनन् भन्ने धेरै छन् । स्वयं नेपाल र भट्टराईलाई यस्तो आशंका रहेको छ ।

त्यही भएर पछिल्ला दिनमा नेता नेपाल र भट्टराईबीच घनिभूत रुपमा छलफल चलिरहेको छ । ओलीको ज्यादतिबाट उन्मुक्ति पाउन पीडित वाम नेताहरु छुट्टै मोर्चा बनाउन लागिपरेका छन् । स्रोतका अनुसार, यसका लागि माओवादी अध्यक्ष पुष्पकमल दाहाल ‘प्रचण्ड’सँग पनि पटक पटक छलफल भइरहेको छ । सबै कुरा मिल्यो भने यथाशीघ्र प्रचण्ड, माधव, बाबुराम, उपेन्द्र यादव, मोहन वैद्यलगायतको वृहत्तर मोर्चा बनाइने छ । सकेसम्म पुरानो नेकपा प्रकरणलाई नै ब्यूँताएर अगाडि बढ्ने मनसाय नेताहरुको रहेको छ ।

यसका लागि आजै मात्र प्रचण्डले सर्वाच्च अदालतमा नेकपा खारेजी र एमाले – माओवादी ब्यूँताउने फैसला उपर पुनराबलोकन गर्न निवेदन दिइएको छ । यो विषयले सजह निकास पाए त्यसै गर्ने, नत्र वृहत्तर एकताको लागि नयाँ शीराबाट काम थाल्ने सोच नेताहरुको रहेको छ । जे भएपनि ओलीको निरंकुशतन्त्र ढाल्न फेरि पनि वामपन्थीहरु नै अग्रसर हुनुपर्ने अवधारणाको विकास भएको पाइन्छ । त्यसका लागि अब केही दिन प्रतीक्षा गर्नुको विकल्प देखिंदैन ।