ओलीलाई पाण्डेले भने, प्रश्नहरु हेर्दा तपाईमाथि नै धेरै प्रश्न सोझिएका छन् !

१७ चैत, काठमाडौं । नेकपा एमालेका नेता सुरेन्द्र पाण्डेले पार्टी गुटका निर्णय पार्टी निर्णय हुन नसक्ने भन्दै अध्यक्ष केपी ओलीले सोधेको स्पष्टीकरणको जवाफ पठाएका छन् । मंगलबार अध्यक्ष केपी शर्मा ओलीलाई सम्बोधन गर्दै स्पष्टीकरणको जवाफ पठाएका नेता पाण्डेले भनेका छन्, ‘तपाईले मलाई आरोपका रुपमा विभिन्न प्रश्नहरु तेर्स्याउनुभएको छ । प्रश्नहरु हेर्दा तपाईमाथि नै धेरै प्रश्न सोझिएका छन् ।’

ओलीका नाममा पत्र पठाउदै पाण्डेले पठाएको स्पष्टीकरणको जवाफमा भनिएको छ, ‘स्पष्टीकरण दिनु पर्ने त हुँदै होइन, कुनै पनि उत्तरसमेत लेख्‍न जरुरी छैन तर तपाईले लगाएका आरोपहरू कति पूर्वाग्रही छन्, र तपाईका दाबीहरू कति झूठा छन् भन्‍ने कुरा पार्टी पङ्तिलाई जानकारी गराउनु पर्ने भएकोले यो पत्र लेख्दै छु ।’

पत्रमा पाण्डेले ओलीले लगाएको आरोपको खण्डन गरेका छन् । ओलीले गुटबाट गरेका निर्णय सबै अवैधानिक भएको बताएका छन् । पाण्डेले पत्रमा भनेका छन्, ‘पार्टी विधानको उपरोक्त व्यवस्थाले तपाईले गरेको भनिएको बैठक, त्यस बैठकले गरेको भनिएका विधान संशोधन गर्ने, त्यसका आधारमा पार्टीको केन्द्रीय निकायमा भर्ति गर्ने, पदाधिकारीहरू परिवर्तन गर्ने, राष्ट्रिय महाधिवेशन आयोजक कमिटी बनाउनेलगायत सबै निर्णयहरु अवैध, अनधिकृत र नक्कली ठहर हुन्छ ।

यसरी तपाईले ‘दशौँ राष्ट्रिय महाधिवेशन आयोजक कमिटी’ को अध्यक्षका रुपमा तपाईको हैसियत, त्यस अर्थमा त्यस कमिटीले गरेको भनिएका निर्णयहरु सबै अवैधानिक छन्, नक्कली छन् ।’ उनले पत्रमा वैधानिक व्यवस्था पनि उल्लेख गरेका छन् ।