राप्रपाकाे क्रियाशील सदस्य बनाउने म्याद चैत मसान्तसम्म

१७ चैत, काठमाडौं । राष्ट्रिय प्रजातन्त्र पार्टी ‘राप्रपा’ले पार्टीका क्रियाशील सदस्य बनाउने म्याद चैत मसान्तसम्म पुर्‍याएको छ । मंगलबार बसेको केन्द्रीय सचिवालय कार्य व्यवस्था समितिको बैठकले २०७८ बैशाखमा हुने पार्टीको महाधिवेशनलाई दृष्टिगत गर्दै पार्टीको सक्रिय सदस्य बनाउने म्याद २०७७ चैत्र मसान्तसम्म थप्‍ने निर्णय गरेको सचिवालय प्रमुख ध्रुवबहादुर प्रधानले जानकारी दिए ।

बैठकले निरञ्‍जन थापाको संयोजकत्वमा हरिनारायण यादव, कुन्तीकुमारी शाही, रामशरण पाठक, राजु वस्‍नेत, चन्द्र काफ्ले, के।पि। पाण्डे सदस्य रहेको विधान संशोधन सुझाव समिति गठन गरेको छ ।

त्यस्तै बैठकले आगामी २०७८ बैशाख २५ देखि २८ गतेसम्म हुने पार्टीको केन्द्रीय महाधिवेशनको सन्दर्भमा स्थानीय तहको समितिहरूको गठन कार्य निर्धारित समयमा पूरा गर्न तथा सक्रिय सदस्यता वितरण कार्यलाई तिव्र बनाउन प्रदेश कार्य समिति र सचिवालयलाई निर्देशन दिने निर्णय पनि गरेको प्रधानले बताए ।