म्यानमार बर्बरताको विरोध

१८ चैत, काठमाडौं । म्यानमारका भएको सैनिक कू र सर्वसाधारणमाथिको बर्बतापूर्ण नरसंहारको नेपालमा समेत चर्काे विरोध हुन थालेको छ । आज क्रान्तिकारी अखिल नेपाल विद्यार्थी युनियनले राजधानीस्थित म्यानमारको दूतावास घेराउ गरी विरोध गरेका छन् ।

प्रजातान्त्रिक प्रकृयाबाट जननिर्वाचित दुई तिहाई प्राप्त सरकारलाई अस्तित्वमा आउनै नदिई सैनिक जनरलले सत्ता हत्याएर सर्वसाधारणमाथि दमन गर्न थालेका छन् । यसको विरोधमा संसारभरिका लोकतन्त्रवादीहरुले आवाज बुलन्द बनाइरहेका बेला नेपालमा समेत त्यसको वाछिटा पर्न थालेको छ ।

नेपाली मूलका धेरै वासिन्दा रहेकाले पनि म्यानमारमा हुने गतिविधिप्रति नेपाल र नेपालीको चासो हुने गरेको छ । त्यही भावनालाई संवोधन गर्ने गरी अखिल क्रान्तिकारीका अध्यक्ष रञ्जित तामाङको अगुवाईमा आज दूतावास घेरिएको बताइएको छ ।

साथै, तामाङले दूतावासमा बुझाएको ज्ञापनपत्रमा भनिएकोे छ –शान्तिपूर्ण आन्दोलनलाई बर्बतापूर्वक दबाउने म्यानमारको सैन्य सत्ताको कार्यशैली गलत र भत्र्सनायोग्य छ । हालसम्म बर्मामा पाँचसय भन्दा बढी निहत्था नागरिकको हत्या भइसकेको छ । आन्दोलनमाथि भएको बर्बरताले लोकतन्त्र र मानव अधिकारकै धज्जी उडाएको छ– विज्ञप्तिम उल्लेख छ ।