विसर्जनवादीसँग झुकिंदैन : नेपाल

१८ चैत, काठमाडौं । अनुशासनहिन काम र गतिविधि गरेको आरोपमा ६ महिनाका लागि निलम्बनमा परेका माधवकुमार नेपाल आफ्नो गुटगत भेला र गतिविधि अझै तीब्र बनाउने अभियानमा जुटेका छन् । यसैक्रममा आज आफू निकट राष्ट्रिय युवा संघको एक कार्यक्रममा सहभागी नेता नेपालले प्रधानमन्त्री केपी ओलीले कम्युनिष्ट आन्दोलनलाई क्षतविक्षत बनाउन खोजेपनि त्यसलाई बिफल बनाइने दाबी गरे ।

संघले स्थापना गरेको कार्यालय भवनको उद्घाटन गर्दै नेता नेपालले अबका दिन एमालेका लागि अझै चुनौतीपूर्ण रहने दाबी गरे । एमाले पार्टी हामीले बनाएका हौं, अहिले केही मानिस मन्त्री र पद खान आएकाले यो विरासत निर्माण गरेको होइन, त्यसैले एमालेको मूलधार भनेका हामी हौं, कसैले कारबाही गर्ने हैसियत राख्न सक्दैन–नेता नेपालले भने ।

अब देशव्यापीरुपमा कम्युनिष्ट विचारधारा र दर्शनलाई नयाँ ढंगले जीवनशैलीका रुपमा उतार्ने असली वामपन्थीहरुको मोर्चाबन्दी गर्नुपर्ने आवश्यकता रहेको समेत उनले प्रष्ट्याए । कम्युनिष्ट आन्दोलनलाई हामी छिन्नभिन्न पार्न दिने छैनाैँ भन्दै नेता नेपालले विसर्जनवादी शक्तिलाई परास्त गर्न कृयाशील रहनेसमेत उनले बताए ।

सोही कार्यक्रममा नेता नेपालले आफू पक्षीय बेग्ले कार्यालय रहने संकेत गर्दै भने – हामीलाई पनि भेला छलफल गर्न कार्यालय चाहिएको छ , जानकारी भए भन्नुहोला ।