ओली सरकारको म्याद चैत २३ गतेसम्म मात्रैः गुरुङ

१८ चैत, काठमाडौं । नेकपा माओवादी केन्द्रका नेता देवप्रसाद गुरुङले वर्तमान केपी ओली नेतृत्वको सरकारले यही चैत २३ गते भित्र विश्वासको मत लिन नसके अवैधानिक हुने जिकीर गरेका छन् । आज प्रतिनिधिसभा बैठकको शून्य समयमा बोल्दै माओवादी संंसदीय दलका प्रमुख सचेतक समेत रहेका गुरुङले यस्तो जिकीर गरेका हुन् ।

सर्वाेच्च अदालतको फागुन ११ गते आएको संवैधानिक इजलाशको फैसलालाई उधृत गर्दै नेता गुरुङले भने–फैसलाले वर्तमान सरकारलाई संविधानको धारा ७६ को उपधारा १ अन्तर्गत भनेको छ, तर फागुन २३ को अर्काे फैसलाले सरकार धारा ७६ को उपधारा २ मा रुपान्तरण भएकाले विश्वासको मत लिनैपर्ने वाध्यता छ । तर ओली सरकारले अहिलेसम्म त्यस्तो प्रयास गरेको छैन । अब केवल केही दिन मात्र बाँकी छ ।

फागुन २३ गतेले नेकपा विभाजित गरी पूर्वास्थामा पु¥याएकाले स्वभाविक रुपमै प्रधानमन्त्रीले ३० दिन भित्र विश्वासको मत लिनुपर्ने हुन्छ – उनको दाबी छ । कानून व्यावसायीसमेत रहेका गुरुङले दल विभाजन भइसकेको अवस्थामा धारा १०० को उपधारा २ आकर्षित हुने धारणा राखेका छन् ।

उक्त धारामा दल विभाजित भएमा वा सरकारमा रहेको दलले समर्थन फिर्ता लिएमा प्रधानमन्त्रीले ३० दिन भित्र प्रतिनिधिसभाबाट विश्वासको मत लिनुपर्ने व्यवस्था रहेको छ ।